FETEN peslla una selmana enllena teatru

Xixón despide esti vienres la Feria Europea d'Artes Escéniques pa Neños y Neñes qu'enllenó d'actividaes una selmana na que grupos de teatru, programadores,distribuidores y profesionales de les artes escéniques se dieron cita na capital de la costa verde.

Alcuentros profesionales, presentaciones, esposiciones, danza, maxa, circu y teatru, munchu teatru. Dende les puestes n'escena mas tradicionales a les que la teunoloxía convierte hologrames en títeres. D'obres onde'l soníu y la imaxen camuden en sensaciones qu'emocionen al públicu a adaptaciones lliteraries onde la pallabra ye la protagonista. Alcuerdos escondíos al otru llau de les cuerdes por documentalistes anónimos y esperiencies que siguirán na alcordanza del públicu, sobre too na de los miles de neños que durante esta selmana aplaudieron los espectáculos esperdigaos pelos estremaos espacios : nel Teatru Xovellanos, na cai, nes sales alternatives, nel Muséu Nicanor Piñole o los microespacios del iglú de maera y la chabola montaos nun aula del C.P. Xovellanos.