FESTIN 2019,del 6 al 9 de xunu.

FESTIN 2019,del 6 al 9 de xunu. Esti xueves entamó en Samartín del Rei Aurelio el V Festival Escena Féstin que se desenvuelve hasta'l 9 de xunu con una programación fundamentalmente de cai y pa tolos públicos, con espectáculos d'humor, maxa, danza contemporánea y clown. Nesta ocasión va tener llugar un gran festival escénicu poles cais de les trés localidaes que se van ver lliteralmente tomaes por una variedá d'actuaciones entreteníes y sorprendentes a les que va ser difícil permanecer indiferente.

Festin arrancó 'l xueves col xuegu d'imaxinación Al circu, de Tras la Puerta Títeres, pa neños d'hasta trés años, y va siguir el vienres, con muncho humor y maxa na cai, de la mano del magu y clow Adrián Conde, col espectáculu El gran Braulio, na plaza de la ilesia de Sotrondio, a les 19,30 hores.

Na xornada del sábadu va tener llugar el show Caxes máxiques y barraques de feria, con dos espectáculos: El Circu-lo y el Tornasol, del Grupu de Teatru Los Pintores y Kamante Teatru, respectivamente, nel kiosko y el parque de La Llaguna, ente les 17 y les 19 hores.

El mesmu día, na plaza de la ilesia de L'Entregu, danza contemporánea col show Play again, de Proyectu Piloto Cia, Robeca Tassis, a les 19,30 hores, al que va siguir l'espectáculu Ella yera yo, d'Ana Serna y Lauren Atanes, sobro la violencia machista.

El domingu 9 de xunu va tar dedicáu a los payasos y les bicicletes. La exhibición Biciclown, de Pablo Picallo, va tener llugar na plazoleta de la ilesia de Blimea, a les 12 hores.

Amás de la programación de cai destaca l'espectáculu de danza tradicional con adaptación contemporánea ¿Aire?, de la veterana compañía Nun Tris, que va tener llugar nel Teatru Municipal, en L'Entregu, el mesmu domingu, a les 20 hores y darréu va facese entrega del V Premiu Festin a la compañía NUN TRIS TEATRU pola so trayectoria y ser la primer compañía profesional n'incluyir con normalidá les representaciones en llingua asturiana.