FÉSTIN 2018. El Festival de Teatru Profesional de Samartín del Rei Aurelio

Samartín del Rei Aurelio va acoyer la cuarta edición del festival escena FESTIN del 31 de mayu al 3 de xunu entamáu pola Conceyalía de Cultura y la compañía El Encuentro Teatro con una decena d'espectáculos col teatru más contemporáneu y la danza más actual, interpretaciones de cai, títeres o pasacais, too ello coles mires d'averar tantu al públicu adultu como al públicu familiar con propuestes distintes y novedoses de xéneros variaos concentraos en cuatro díes de festival.
Pa la organización, FESTIN "ye un apueste cultural por fomentar y promocionar espectáculos de teatru y danza contemporáneos que sían esperimentales na composición dramático y coreográfico, marcando una buelga estremada frente a otres propuestes culturales similares y ensin perder de vista la idiosincrasia del propiu territoriu nel que se celebra".
Col ánimu de que'l festival llegue al mayor númberu de persones de dientro y fora del conceyu, "la cartelera contempla espectáculos de cai gratuitos, pensaos pa'l públicu familiar, y actuaciones nel Teatru a un preciu módico de cinco euros pa'l públicu adultu", añedieron.
Nestos cuatro años de trayectoria, "pasaron por esti festival compañíes d'Asturies y de distintes provincies españoles, munches de les cuales consagraes y de referencia nacional, frente a otres muncho más nueves y prometedores tocantes a la so trayectoria", apuntaron. "Teatru, poesía, danza, esposiciones o charres vistieron el FESTIN en cada edición con apuestes bien variaes, distintes y novedoses. Anguaño, vamos cuntar con compañíes de Barcelona y Baleares", informaron.
La programación d'esti añu promete nun dexar indiferente, arrinca'l xueves 31 de mayu, col espectáculu de títeres "De papel, teatros y títeres", al cargu de Tres la Puerta Títeres y Tragaluz Títeres, de 10 a 13 hores, na Aula Cultural La Plaza, alcordáu con colexos del conceyu, qu'inclúi una esposición con visita  y función. La mesma función va tar abierta al públicu  xeneral el sábadu 2, a les 18,00 hores.
Pela tarde, el Teatru Municipal va acoyer l'actuación de "La mio gran obra", una reflexón sobro la grandiosidá de determinaos espectáculos, del barcelonés David Espinosa, a partir de los 300 "actores" en miniatures a escala, que'l públicu va ver mui cerca del artista.
Ye una apuesta valiente pol teatru escénicu d'oxetos que se van ver per primer vegada n'Asturies, que figura ente los espectáculos más aclamaos y xenuinos del panorama teatral. Va haber dos pases, a les 19,30 hores, el primeru, y a les 21,00 hores, el segundu, dambos con un aforu máximu de venti espectadores.
Los actos van siguir el vienres 1 de xunu colos pasacais "Personaxes Mitolóxicos", de la compañía Mythinerantes, con Rafa Suco y Alejandro G. Wegener, a les 12,30 hores, pol bulevar de l'avenida de la Llibertá, coincidiendo cola celebración del mercadín selmanal. El mesmu pasacais va repitise pela tarde, a les 19,00 hores, en Sotrondio, na plaza de Ramón y Cajal .
De tarde, dientro del Circuitu Asturianu d'Artes Escéniques, la compañía El Somny Produccions, va poner n'escena la obra "Un tranvía llamáu deséu", de Tenesse Williams, a les 20,00 hores, nel Teatru Municipal de L'Entregu pal públicu adultu, dando una vuelta de tuerca a esti clásicu del teatru estadounidense.
Y del teatru a la danza contemporánea, el sábadu 2 de xunu con dos pieces curties producíes por dos muyeres: "Solo Mirada", d' Estrella García (Zigzag Danza) y "A corazón abiertu", d'Andrea Lebeña (Seda Danza), a les 20,00 hores, nel Teatru Municipal, pal públicu adultu.
L'actuación d'estes baillarines va dar pasu nel mesmu teatru a la entrega del premiu FESTIN 2018 a les Muyeres de la Escena Profesional Asturiana, a tou un colectivu femenín de ceadores, actrices, dramaturgues, productores, baillarines, coreógrafes, titiriteres, narradores o técniques, en visu a rindi-yos homenaxe pola so aportación a les artes, visibilizar el so trabayu de plena dedicación y esfuerzu diariu.
Pa cerrar FESTIN, el domingu 3 de xunu, sesión vermut col espectáculu d'improvisación, otra de les novedaes de la edición d'anguaño, "La Familia Trivilorio", de la compañía asturiana Trivilorio Impro, pensáu pal públicu familiar, a les 12,30 hores, na Aula Cultural La Plaza de Sotrondio.
A lo último, el Teatru Municipal va acoyer una meyora del espectáculu "Matanza", del actor, director y dramaturgu Borja Roces (El Encuentro Teatro), protagonizada pola actriz Ana Morán, a cuenta de la matanza del gochu como xunta social d'una tradición ancestral, que fala de la muyer y de les alcordances de la infancia. Con este "work in progress", El Encuentro Teatro formula un planteamientu distintu de los conceutos escénicos más convencionales na busca de nueves fórmules narratives.