FÉSTIN 2018,del 31 de mayu al 3 de xunu

Samartín del Rei Aurelio acueye la cuarta edición del festival escena FESTIN del 31 de mayu al 3 de xunu entamáu pola Conceyalía de Cultura y la compañía El Encuentro Teatro con una decena d'espectáculos que tomen el teatru más contemporáneu y la danza más actual, interpretaciones de cai, títeres o pasacais, too coles mires d'averar tantu al públicu adultu como al públicu familiar propuestes distintes y novedoses de xéneros variaos concentraes en cuatro díes de festival.
Pa la organización, FESTIN "ye unu apueste cultural por fomentar y promocionar espectáculos de teatru y dancia contemporáneos que sían esperimentales na composición dramática y coreográfica, marcando una buelga estremada frente a otres propuestes culturales similares y ensin perder de vista la idiosincrasia del propiu territoriu nel que se celebra".
Col ánimu de que'l festival llegue al mayor númberu de persones de dientro y fora del conceyu, la cartelera contempla espectáculos de cai gratuitos, pensaos pal públicu familiar, y actuaciones nel Teatru a un preciu módico de cinco euros para'l públicu adultu..
Nestos cuatro años de trayectoria, pasaron por esti festival compañíes d'Asturies y de distintes provincies españoles, munches de les cuales consagraes y de referencia nacional, frente a otres muncho más nueves y prometedores tocantes a la so trayectoria. Teatru, poesía, danza, esposiciones o charres vistieron el FESTIN en cada edición con apuestes bien variaes, distintes y novedoses. Anguaño va cuntase con compañíes de Barcelona y Baleares.
La programación d'esta edición, que promete nun dexar indiferente, entama esti xueves 31 de mayu, col espectáculu de títeres "De papel, teatros y títeres", al cargu de Tras la Puerta Títeres y Tragaluz Títeres, de 10 a 13 hores, na Aula Cultural La Plaza, alcordáu con colexos del conceyu, qu'inclúi una esposición con visita guiada y función. La mesma función va tar abierta al públicu xeneral el sábadu 2, a les 18,00 hores.
Pela tarde, el Teatru Municipal va acoyer l'actuación "La mio gran obra", una reflexón sobro la grandiosidá de determinaos espectáculos, del barcelonés David Espinosa, a partir de los 300 "actores" en miniatures a escala que'l públicu va ver mui cerca del artista.
Ye una apuesta valiente pol teatru escénicu d'oxetos que se va ver per primer vegada n'Asturies, que figura ente los espectáculos más aclamaos y xenuinos del panorama teatral. Va Haber dos pases, a les 19,30 hores, el primeru, y a les 21,00 hores, el segundu, dambos con un aforu máximu de venti espectadores.
Los actos van siguir el vienres 1 de xunu colos pasacais "Personaxes Mitolóxicos", de la compañía Mythinerantes, con Rafa Suco y Alejandro G. Wegener, a les 12,30 hores, pol bulevar de l'avenida de la Llibertá en Blimea, coincidiendo cola celebración del mercáu selmanal. El mesmu pasacais va repitise pela tarde, a les 19,00 hores, en Sotrondio, na plaza de Ramón y Cajal .
De tarde, dientro del Circuitu Asturianu d'Artes Escéniques, la compañía El Somny Produccions, va poner n'escena la obra "Un tranvía llamado desseo", de Tenesse Williams, a les 20,00 hores, nel Teatru Municipal, en L'Entregu, pal públicu adultu, dando una vuelta de tuerca a esti clásicu del teatru estadounidense.
Y de'l teatru a la danza contemporánea, el sábadu 2 de xunu con dos pieces curties producíes por dos muyeres: "Solo Mirada", de Estrella García (Zigzag Danza) y "A corazón abiertu", d'Andrea Lebeña (Seda Danza), a les 20,00 hores, nel Teatru Municipal, pal públicu adultu.
L'actuación d'estes baillarines va dar pasu nel mesmu teatru a la entrega del premiu FESTIN 2018 a les Muyeres de la Escena Profesional Asturiana, a tou un colectivu femenín de ceadores, actrices, dramaturgues, productores, baillarines, coreógrafes, titiriteres, narradores o técniques, en visu a rindi-yos homenaxe pola so aportación a les artes, visibilizar el so trabayu de plena dedicación y esfuerzu diariu.
Pa cerrar FESTIN, el domingu 3 de xunu, sesión vermut col espectáculu d'improvisación, otra de les novedaes de la edición d'anguaño, "La Familia Trivilorio", de la compañía asturiana Trivilorio Impro, pensáu pal públicu familiar, a les 12,30 hores, na Aula Cultural La Plaza.