Feries y Alcuentros Teatrales
Estremaos llugares desendolquen interesantes actividades teatrales que muestren la bayura y diversidá de los grupos de teatru qu'enllenen cais, places y teatros en prósimes feches.
Una de les cites ye l'alcuentru Internacional d'Artistes Caleyeros d'Aguilar de Campoo que se celebra dende'l 16 al 19 d'agostu.
Del 21 al 25 d'agostu tién llugar la Feria de Teatru de Castiella y Llión en Ciudad Rodrigo.Una feria que volverá convertise nel principal mercáu del Occidente Peninsular .
Del 27 al 30 de setiembre Palma de Mallorca acueye la cuarta edición de Fira B, el Mercáu Profesional de Música y Artes Escéniques de les Illes Balears, impulsada pola Conselleria de Cultura, Participación y Deportes.
Maxa, arte urbano, circu y teatru podrán esfrutase nel 24 Alcuentru Internacional d'Artistes Caleyeros de la villa galletera que se va desenvolver na Plaza d'España, el Patiu de La Compasión, el Polideportivu y les piscines de branu. Tamién va haber conciertos, grafitis y poemes que van cayer del cielu.
La Conceyalía de Cultura del Conceyu d'Aguilar de Campoo yá tien llista la programación del 24 Alcuentru Internacional d'Artistes de Cai (ARCA) que se va desenvolver del 16 al 19 d'agostu na villa galletera. En total van ser doce espectáculos los que los aguilarenses y visitantes van poder esfrutar y con diversos xéneros, amás d'un pequeñu festival de música, realización de grafitis y una acción poética.
L'espectáculu d'apertura, que va tener llugar el día 16 d'agostu a les 20,30 hores, va correr al cargu de La Nave-Teatru Calderón -compañía de Castiella y Llión-, que va ufiertar Fueos. Trátase d'una intervención escénica con más de cincuenta artistes desenvuelta sobre'l conceutu del Éxodu, dende múltiples espresiones artístiques, y proponiendo una reflexón sobre los drames que los refuxaos y emigrantes viven ca día.
Ciudad Rodrigo y la XXI Feria de Teatru de Castiella y Llión ye una cita imprescindible nel ámbitu de les artes escéniques que cada añu arropen más de 250 entidaes profesionales acreditaes y más de 33.000 espectadores, qu'a lo llargo de cinco díes conocen les propuestes más actuales de 40 compañíes que presenten distintos formatos, xéneros, llinguaxes escénicos y variedá de públicos.
La Conseyería de Cultura y Turismu de la Xunta de Castiella y Llión promueve la organización de la Feria de Teatru n'alianza col Conceyu de Ciudad Rodrigo, la Diputación Provincial de Salamanca y l'Asociación Civitas; perseverando nes estratexes de promoción de les industries culturales y la estimulación del mercáu de les artes escéniques de forma prioritaria en Castiella y Llión, Estremadura y Portugal.
Dempués de venti ediciones, la Feria de Teatru consolidóse como un importante puntu d'alcuentru pal sector, onde destaca la fuerte implicación que se caltién col mercáu portugués y el fechu de que'l públicu convirtióse nuna pilastra fundamental de la Feria. La Feria de Teatru de Ciudad Rodrigo ye una feria xeneralista, onde se prima la novedá, y acueye tou tipu de propuestes escéniques.
El talentu creativu del sector ye un motor que revitaliza la Feria cada edición. Una parte bien importante de la programación ta destinada al públicu infantil y familiar; según un terciu de la mesma ye d'artes de cai, pa tolos públicos
La Feria desendólcase en 15 espacios distintos y aprosimao un 30% de les compañíes son de Castiella y Llión, un 15% son estranxeres y el restu de procedencia nacional. Dempués de tantu tiempu la Feria configúrase como un serviciu públicu para la estimulación de les industries culturales de la Comunidá Autónoma apurriendo enerxía a la dinamización de los mercaos escénicos na península ibérica y contribúi a revalorizar tol territoriu.
La cuarta edición de Fira B, el Mercáu Profesional de Música y Artes Escéniques de les Illes Balears, impulsada pola Conselleria de Cultura, Participación y Deportes,propón como novedaes d'anguaño dellos intercambios con artistes de Canaries o Suecia.
La Fira B!, el Mercáu Profesional de Música y Artes Escéniques de les Illes Balears, impulsada pola Conselleria de Cultura, Participación y Deportes ye'l principal acontecimientu qu'entama'l Institut d'Estudis Baleàrics.
Del 27 al 30 de setiembre celebrará la cuarta edición, pa la que s'escoyeron 24 espectáculos d'artes escéniques y 44 showcases de música, d'un total de 459 propuestes recibíes, 202 d'artes escéniques -Illes Balears 74, Cataluña 44, Comunidad Valenciana 28, restu d'España 50, internacionales 6- y 257 de música -Illes Balears 149, Cataluña 67, Comunidad Valenciana 11, restu d'España 24 ya internacionales 6.