Estrenu de "La Strada"

El Centru Niemeyer acueye l'estrenu absolutu de "La Strada" .El sábadu 10 de payares a les 20:30 l'Auditoriu recibe esti clásicu de Federico Fellini adaptáu por Gerard Vázquez y dirixíu por Mario Gas.

Alfonso Lara, Verónica Echegui y Alberto Iglesias componen el repartu d'esta obra ambientada na posguerra italiana.

Tres el so estrenu nel Centru Niemeyer "La Strada" podrá vese en Madrid, nel Teatru de l'Abadía, del 22 de payares al 30 d'avientu.

La poesía y la miseria xúntense en "La Strada" para reflexar la Italia de la Postguerra. Too empieza cuando una rapaza inocente ye vendía pola so madre a un forzudu de circu, bravucón y violentu, pa que lu ayude nel so espectáculu ambulante. Nel camín surde ente ellos daqué d'amor que nun consigue aprucir pola mor del arguyu d'él y la cobardura d'ella. Dambos comparten una fonda soledá y una vida de marxinación, desarraigu y miseria. Hasta que s'atopen con El Llocu, otru artista de circu que va provocar los celos de Zampanó y, con ello, un tráxicu desenllaz.

Estos trés personaxes, interpretaos por Alfonso Lara, Verónica Echegui y Alberto Iglesias, atópense atrapaos nuna vida a la que tán condergaos, pol so propiu calter, a un destín tráxicu que resulta inevitable. Al traviés d'esti tríu y casi ensin artificiu, la obra consigue falar de toos nós, de la nuesa dificultá pa camudar, pa lluchar contra les idees preestablecíes que moldien el nuesu pensamientu de forma invisible, de la nuesa ceguera pa romper les cadenes que nun nos dexen colar del covarón y conocer col oxetivu últimu de ser más llibres.