Esposición nel Muséu Belles Artes d’Asturies DIONISIO GONZÁLEZ. CONSTRUYIR, HABITAR, EXISTIMAR Del 14 payares de 2017 al 11 febreru de 2018

Dionisio González (Xixón, 1965) ye un fotógrafu y artista multidisciplinar asturianu. Na so produción entemez l'arquitectura, el diseñu, la fotografía y l'arte. Llicenciáu en Belles Artes (Universidá de Sevilla, 1989), ye tamién doctor pola mesma universidá (1999), a la que siguió venceyáu como profesor dende la finalización de la so carrera. Amplió amás la so formación en grabáu y procesos fotográficos y multimedia en distintes ciudaes europees como Lisboa, Devon (Inglaterra), Edimburgo y Londres.

Nel so trabayu, desenvueltu de normal en series, Dionisio González cavilga sobro les maneres d'habitar la ciudá contemporanea, les formes de vivir del sieglu XXI y les relaciones que l'home establez col mediu. La mayoría de les obres son fotografíes, imáxenes tomaes in situ pol artista que depués modifica nel so estudiu dixitalmente, nun procesu de re-invención de paisaxes suburbanos non exentos de ciertu barroquismu. Precisamente nesta mesma llínea de trabayu va esquizar esti nuevu proyectu, tituláu Construyir, habitar, existimar, onde se van amosar series fotográfiques yá conocíes anque nunca vistes n'Asturies, como Thinking Central Park, Dauphin Islands y Dialectical Landscapes según el proyectu de nueva creación Construyir, habitar, existimar, que da títulu a la esposición y que ta integráu por dellos hologrames, maquetes y semeyes en color y blancu y negru.

Dionisio González recibió emportantes reconocencies internacionales, como'l Premiu Pilar Xuncosa y Sotheby´s, el Premiu Fundació Pilar i Joan Miró, el European Month of Fotography Arendt Award (Luxemburgu), etc. La so obra ta presente en museos como'l Muséu Nacional Centru d'Arte Reina Sofía, el Museum of Contemporary Photography, de Chicago y el Centru Nacional d'Arte Contemporaneo de París, amás de n'importantes colecciones privaes.