Esposición de Juan Ardisana nel Muséu Etnográficu del Oriente d' Asturias en Porrúa

Coincidiendo col 20 aniversariu de l'apertura del Muséu Etnográficu del Oriente d'Asturias en Porrúa inaugúrase una esposición del fotógrafu de H.ontoria, Juan Ardisana, que recueye imáxenes dende 1977 a 1990 .

Juan Ardisana ye un fotógrafu aficionáu del que la so obra más personal muéstrase por primer vegada al públicu nesta esposición entamada pol Muséu Etnográficu del Oriente d'Asturias y el Muséu del Pueblu d'Asturies.
Nacíu en 1946, en Cuerres (Ribesella), onde'l so padre yera maestru d'escuela,  treslladaríase depués a Cardosu y a H.ontoria (Llanes).
Empieza la so carrera a principios de los años setenta. Llogra galardones y menciones de calter local y nacional. Na década de los ochenta  tien collaboraciones esporádiques na prensa, ilustrando testos periodísticos del so hermanu, el poeta Pablo Ardisana.
Les semeyes escoyíes pa esta esposición constitúin una muestra de la sensibilidá de Juan Ardisana para captar tipos populares, escenes de la vida cotidiano y festivo, la naturaleza y el paisaxe de la so redolada más cercana. Tán feches na localidá de Cuerres (Ribesella), na capital del conceyu de Llanes y nos valles de San Xurde, Ardisana y Valdellera.
La selección de fotografíes, nun marcu temporal que va de 1977 y 1990, revela'l mundu del que forma parte'l fotógrafu, el d'una vida fundamentalmente rural y popular qu'escurre ente los entamos de la democracia y los de la eclosión turística.