Emmanuel Carrère Premiu Princesa d' Asturies de les Lletres 2021

Emmanuel Carrère nació en París el 9 d'avientu de 1957. Escritor, guionista y realizador francés, ye diplomáu pol Institutu d'Estudios Políticos de París. Vivió dos años en Surabaya (Indonesia) trabayando como profesor de francés. Debutó como críticu de cine nes revistes Positif y Télérama.

En 1982 publicó la so primer obra, Werner Herzog, una monografía sobre esti realizador, y al añu siguiente apaeció la so primer novela, L'amie du jaguar. Publicó dempués Bravoure (1984) (Bravura, 2016) y en 1986, La moustache (El bigote, 2015), qu'en 2005 adaptó al cine y que, d'acordies con John Updike, «déxate KO en menos de 150 páxines».

Foi miembru del xuráu internacional del Festival de Cannes (2010) y del xuráu del Cinéfondation, lo mesmo que de la sección de curtios de Cannes (2012). En 2015 foi miembru del xuráu del Festival Internacional de Cine de Venecia.

A partir de la so obra L'Adversaire (2000) (L'adversariu, 2006), sobre l'asesín Jean-Claude Romand, que llogró gran ésitu de crítica y públicu, Carrère abandonó la ficción y empezó a escribir testos nos que narra la so propia esperiencia o les vides reales d'otres persones y de personaxes hestóricos. Él insiste en qu'esta obra y les siguientes nun son obres de ficción: «La verdá que nun sé cuántes vegaes hai que dicir que les coses son verdá, qu'asocedieron como tán rellataes. Escribir delles vegaes nel llibru y aun así paez qu'hai xente que nun ta dispuesta a entender que puede escribise daqué que sía verdá, qu'hai muncha xente que fai una conexón directa ente "lliteratura" y "novela", que considera que la lliteratura solo puede ser ficción». Esti tipu de testu, nel que s'entecrucen fechos y personaxes de la vida real con reflexones sobre l'actu d'escribir y l'esperiencia del propiu autor, ye tamién el qu'apaez nes sos siguientes obres, Un roman russe (Una novela rusa, 2007) o D'autres vies que la mienne (2009) (De vides ayenes, 2011), na que les hestories marcaes pola enfermedá, el duelu y la desgracia de dellos personaxes entecrúcense, y na que fala del tsunami de 2004, que vivió en primer persona.