El Tesoru del Rei Aurelio,scape-room n'asturianu
La Casona del Bravial en Blimea acoyó la presentación de l'actividá EL TESORU DEL REI AURELIO. La conceyala en funciones d'Educación y Cultura, María Alonso García y el Presidente de l'Asociación Bicentenariu de Samartín del Rei Aurelio , Martín Ardines, presentaron esta iniciativa qu'entamen coincidiendo col quintu aniversariu de l'asociación, que tuvo llugar el 2 de xunu de 2014 para conmemorar los dos feches en que'l conceyu segregóse de Llangréu en 1820 y 1837.
Trátase d'una animación pa tolos públicos, similar a les sales d'escape o populares scape room, na que distintes pistes van llevar a los participantes por distintes etapes históriques del conceyu y tien a la llingua asturiana como idioma nel que se desenvuelve la trama.
L'Asociación Bicentenariu de Samartín del Rei Aurelio vien entamando dende va cinco años distintes actividaes nes que se busca la participación activa de ciudadanos, investigadores, entidaes ya instituciones para promover la investigación en distintos campos académicos sobre Samartín del Rei Aurelio y l'espardimientu de les iniciatives creatives, d'emprendimientu o d'investigación de vecinos o orixinarios de Samartín del Rei Aurelio.
Nesta ocasión trátase de dar a conocer la hestoria del conceyu y normalizar l'usu del asturianu nuna actividá lúdica que se va desenvolver el vienres 21 y sábadu 22 de xunu , con dos pases , a les 18:00 y 20:00 hores. Desarrollarase en grupos de 9 persones a lo más y los interesaos tienen d'inscribise gratuitamente na Casa de la Mocedá de Sotrondio, daranse les places por rigorosu orde d'inscripción.
La trama desenvuélvese na sala privada d'un coleccionista onde falta la pieza más preciada, la Cruz d'Aquisgrán , que'l mesmu Carlomagno regalara al Rei Aurelio y qu'hasta la so desapaición mientres les guerres carlistes, formaba parte del cayáu de mandu de los alcaldes de Samartín del Rei Aurelio, realizáu con vara d'ablanar y que recibió'l primer alcalde cuando se constituyó'l conceyu en 1837 . Una cruz que foi robada y que los participantes na actividá tendrán d'atopar... o non.