El Sporting viaxa a Mallorca pa metese ente los tres primeros de LaLliga SmartBank

El Sporting enfréntase a les cuatro la tarde d'esti domingu al Real Club Deportivu Mallorca en partíu de LaLliga SmartBank, que se va xugar en Son Moix  nel Visit Mallorca Estadi.
Arbitrará 'l colexáu madrilanu David Gálvez Rascón, que va tar aidáu dende'l VAR pol tamién madrilanu Miguel Ángel Ortiz Arias.
L'equipu xixonés tien les baxes médiques de Cristian Salvador, Marc Valiente, Pablo Pérez y Nacho Méndez, amás de la de Bogdan, baxu tutela de la Federación d'Ucrania. Nel apartáu federativu tampoco va poder cuntase con Carmona, espulsáu la pasada xornada.
Luis García Plaza, entrenador mallorquín, considera al Sporting "un rival que lleva tola temporada nos primeros puestos, que ganó los cuatro primeros partíos y depués foise calteniendo". Cree que "xuega perbién al fútbol" y que "vamos tar cinco o seis peleando tol cursu por tar ehí enriba, y el Sporting ye unu d'ellos: respetámoslu y valorámoslu muchísimu". Asegura que "tien un once titular buenísimo, pa xubir; con un porteru y un central de primer nivel, llaterales súper solventes,un mediapunta internacional sub'21 como Manu, un delanteru que fai munchos goles...". Insistió en que "ye un rival máximu" y en que "los númberos canten y ellos lleven 23 puntos, polo que van lluchar pol ascensu directu".
El Mallorca ocupa la segunda posición na clasificación per delantre del Sporting gracies a los 25 puntos que sumó de resultes de les sos siete victories, cuatro empates y una sola derrota. En total, atropa once partíos ensin perder. Trátase del equipu menos goliáu de la categoría, con namás que dos goles en contra. Ye l'únicu equipu, tanto de primera como de Segunda, que nun recibió nin un tanto en casa, evidencia del so potencial defensivu. Nel ofensivu, foi capaz de marcar en más de la metá de los partíos, en siete, con un balance de trece tantos al cargu de los sos artilleros.