El Sporting sigue imparable na Lliga SmartBank onde permanez invictu

El Sporting sumó la so cuarta victoria consecutiva nel Estadiu Xuegos del Mediterráneu ante l'U.D.Almeria.
Un alcuentru nel que na primer metá hubo apenes ocasiones pa dambos conxuntos, tan solo un disparu del xugador del Almería, Aketxe , que se va fora.
Malapenes delles acciones ofensives llegaríen a balón paráu pero ensin poner n'aprietos a dambos porteros.
Na segunda metá l'U.D. Almería imprimió más velocidá y más llegada a la portería de Mariño pero la solidez defensiva del Sporting y la seguridá del porteru sportinguista torgaron al Almería facer gol.
Colos cambeos introducíos pol míster visitante, David Gallego dio más fondura al equipu asturianu.
El gol llegaría mediada la segunda metá gracies al debutante Saúl García que manda un balón en llongura a Djuka pa marcar prácticamente sobre la mesma llínea de gol.
Unos minutos más tarde l'árbitru Ávalos Becerra decretaría un penalti por posible mano d'un defensor sportinguista,pero tres la consulta del monitor del VAR esta acción quedaría anulada.
El Sporting sigue imparable na Lliga SmartBank onde sigue invictu,ensin encaxar nengún gol en contra y col so máximu artilleru, el serbiu Djuka que lleva 4 goles en 4 xornaes convirtiéndose nel pichichi de la segunda división.
El próximu domingu segunda salida consecutiva del Sporting , nesta ocasión nun va ser llueñe del Molinón pos va desplazase a la capital del Principáu pa enfrentase nel NMR Carlos Tartiere al Real Oviedo a les nueve de la nueche .