El Niemeyer en Samartín del Rei Aurelio

La Casa de la Xuventú de Sotrondio acueye la esposición "Centru Niemeyer.Reflexos d'Asturies". D'esta manera Samartín ye la décima see (dempués de Llanes, Grau, Valdés, Navia, L.lena, Tinéu, Cabranes, Somiedu y Colunga) n'acoyer la primer esposición del Centru Niemeyer qu'itinera pa mostrar l'equipamientu avilesín nos conceyos d'Asturies .

L' Alcalde del conceyu,José Ángel Álvarez tuvo na inauguración y presentación de la esposición "Centru Niemeyer. Reflexos d' Asturies" fecha por Carlos Cuadros, Director del Niemeyer, Borja Ibaseta, Coordinador d' Actividades y Armando Adeba, comisariu de la esposición, xunto al direutor de la oficina de Caxa Rural d'Asturies en L'Entregu.

Al traviés de fotografíes y reproducciones artístiques centraes nel complexu cultural diseñáu por Oscar Niemeyer los visitantes van poder percorrer los primeros pasos de les obres nel añu 2007, el conxuntu del procesu constructivu, el resultáu final (que muestra al Centru Niemeyer como obra d'arte en sí mesmu) y, amás, delles imáxenes d'actividaes culturales destacaes que se desenvolvieron nos sos espacios a lo llargo de toos estos años.
La esposición, producía pel Centru Niemeyer y patrocinada por Caxa Rural d'Asturies, tará na Sala d'Esposiciones de la Casa de la Mocedá de Samartín del Rei Aurelio, hasta'l 23 de xunetu. A lo llargo de los próximos meses va llegar a otros conceyos asturianos que yá mostraron el so interés n'acoyer esta esposición fotográfica.
La muestra podrá visitase de llunes a xueves de 10:00 a 13:00 y de 17:00 a 21:00 y los vienres de 9:00 a 15:00 na Casa de la Xuventú .