EL MUSÉU DEL PUEBLU D'ASTURIES INCORPORA A LA SO COLECCIÓN OTRU CARTELU DE PROMOCIÓN TURÍSTICA D'ASTURIES REALIZÁU POR ALFONSO

Una nueva obra pasó a engrosar la colección de cartelos del Muséu del Pueblu d´Asturies. Trátase d'un cartelu de promoción turística d'Asturies fechu en 1955 por Alfonso (Alfonso Iglesias López de Vivigo, Navia, 1910-Uviéu, 1988), por encargu de la prestixosa compañía de viaxes Wagons Lits / Cook. La impresión del cartelu fízose en Madrid, na Imprenta y Litografía d'Ernesto Catalá, empresa fundada en 1830. Les sos midíes son 100 x 70 cm.
Esta obra ye singular por diversu motivos. En primer llugar polo que significa na recuperación d'esa proyección esterior n' atraer al turismu européu escontra Asturies, siguiendo les pautes empecipiaes nos años venti na serie de cartelos turísticos diseñaos por artistes como Vaquero Palacios, Moré y otros. Esa recuperación de ciertu cosmopolitismu caltiense durante la Guerra Civil coles llamaes "Rutes de Guerra", qu'atraxeron fundamentalmente a viaxeros ingleses. Agora, nestos mediaos del sieglu XX, la compañía Wagons Lits / Cook, qu'abriera una axencia n'Uviéu, contemplaba Asturies como una ufierta capaz d'atraer de nuevu al turismu nacional y estranxeru, y d'ende l'encargu d'esti cartelu, que de xuru tuvo ediciones en llingua francesa ya inglesa.
El mensaxe publicitariu ye directu en redol al lema: "Maravíese con Asturies nes escursiones n'autu-pullman"; esto ye, en percorríos programaos por tola xeografía asturiana realizaos n'autobuses de luxu. Estos viaxes veníen tamién a recuperar los efectuaos polos grupos escursionistes asturianos nes décades de los años venti y trenta sobremanera los del Atenéu Obreru de Xixón.
La otra particularidá d'esti cartelu d'Alfonso ye la so orixinalidá nel diseñu, qu'acota una vegada más la cualidá del artista pa encarar con ésitu les más diverses temátiques; unes dotes que lu muestren como'l más versátil y llamativu artista gráficu de postguerra n'Asturies.
Nesti trabayu, Alfonso fai usu d'un recursu casi tópicu nel cartelismo de la so dómina, que son eses fueyes que, como les d'un calendariu, dexen contemplar los diversos paisaxes como los díes que pasen. Destaca amás esi fondu con una carretera tropezosa ente montes pol que transita un modernu autobús, tratáu con un cromatismu aparente pa destacar la variedá de paisaxes del país. L'elementu central de la composición ye un cuadernu en que la so cubierta destaca "Asturies", que vien ser una suerte d'autorretratu, firmando namás el paisaxe de la villa de Cuideiru, a la que taba íntimamente vinculáu pola so rama materna- al destacar, amás, una de les facetes claves de la so biografía artística como ye la so condición d'acuarelista.
L'acuarela foi la técnica dafechu artística d'Alfonso, la que más frecuentó nun momentu nel que surde n'Uviéu una singular xeneración d'acuarelistes de la que tamién formen parte, ente otros, Fermín Pedrosa o Pedro Álvarez Miranda. Nesti cartelu, Alfonso muestra'l so dominiu d'un mediu difícil qu'él concreta con llinguaxe personal y definitoriu. Esti cuadernu ye'l del acuarelista que percuerre Asturies y detiense un momentu a afigurar un paisaxe que-y atrai o impresiona. Ye'l mediu predilectu, siguiendo la tradición anglosaxona, del artista que viaxa y gusta caltener lo contemplao. Y equí, fueya a fueya, tresmítenos los paisaxes más conocíos y refrendaos d'Asturies: Cuadonga, los Picos d'Europa col emblema del Picu Urriellu , la ponte de Cangues d'Onís, la perspectiva d'una sablera cercana al Sueve, Cuideiru, y una cabana y un horru de teito d'escoba del conceyu de Somiedu, detalle que certifica la conocencia que tenía l'artista d'Asturies, siendo ésti últimu paisaxe'l que s'emplegaría costantemente dende los años ochenta na publicidá turísticu institucional del Principáu d'Asturies.
La última singularidá d'esti cartelu ye que non se documenta en nengún de los catálogos publicaos hasta la fecha n'España, polo que podemos afirmar que ye dafechu inéditu. Foi alcontráu nuna galería de Nueva York especializada en cartelos.
Esti cartelu xúnese a otros dos de promoción turística d'Asturies fechos por Alfonso, que fueron encargaos pola Xunta Provincial de Turismu d'Asturies en 1945 y que caltien el Muséu del Pueblu d'Asturies, y a otros trece cartelos que tien el muséu sobre esti mesmu asuntu, fechos ente 1929 y 1983 por artistes como Joaquín Vaquero, Mariano Moré, Teodoro Delgado o Juan Gomila. Estos cartelos esibiéronse'l pasáu branu nel Muséu Nicanor Piñole na esposición "Asturies, guapura categórica. Cartelos pal turismu del Muséu del Pueblu d'Asturies".