El Muséu del Pueblu d’Asturies pon a disposición del públicu los MANUSCRITOS DE LA REAL CONGREGACIÓN DE CUADONGA
El Muséu del Pueblu d'Asturies pon a disposición del públicu los MANUSCRITOS DE LA REAL CONGREGACIÓN DE CUADONGA
El Muséu del Pueblu d'Asturies pon a disposición del públicu pa la so consulta y descarga gratuita los cuatro llibros manuscritos de la Real Congregación de Nra. Sra. de Cuadonga de Naturales del Principáu d'Asturies en Madrid que caltien el muséu.
Esta documentación, que se suponía destruyía durante la guerra civil, foi alcontrada en Madrid en 2014 ya ingresó nel muséu como donación de Fernanda Suárez Gutiérrez.
Los cuatro llibros de la Real Congregación de Nra. Sra. de Cuadonga de Naturales del Principáu d'Asturies en Madrid son:
1. Llibru d'asientu de los congregantes, 1742-1794.
2. Llibru de congregantes, 1796-1911
3. Llibru d'alcuerdos de les Xuntes Particulares, 1744-1760.
4. Llibru d'alcuerdos de les Xuntes Particulares, 1807-1879.
Los dos primeros llibros contienen la inscripción de los congregantes, dende la fundación de la Congregación a 1911, y nellos anótase 'l so nome y el de los sos padres, el llugar de nacencia n'Asturies y de cutiu la casa y l'ocupación en Madrid. Y los dos últimos recueyen les actes de les xuntes de gobiernu, que son una fonte imprescindible pa conocer les actuaciones y los intereses de la Congregación.
Amás de la información que contienen estos cuatro llibros, destaca que toos lleven ensertaos unos grabaos que representen la imaxe de Nuesa Sra. de Cuadonga y del santuariu nel estáu que tenía antes de la so quema en 1777.
Estos grabaos ficiéralos la mesma Congregación y son los más antiguos que se conocen dedicaos a Cuadonga. Trátase de la "Verdadera semeya de N. S. de Cuadonga y el so santuariu", de 1744, y "Altar y tronu de N. S. de Cuadonga", de José Andrade, de 1758.
Son grabaos bien raros, de los que nun esiste nengún exemplar en nenguna biblioteca, archivu o muséu.
Los llibros dixitalizaos tan disponibles nos Fondos Documentales de ayuntamientu de Xixón, nel siguiente enllaz: https://fondos.gijon.es