El Museu del Pueblu d´Asturies presenta nel Muséu la Siderurxa y la Minería de Castiella y Llión, en Sabero (Llión), la esposición “La dura infancia. Fotografía y trabayu infantil n'Asturies, 1885-1971.

El Museu del Pueblu d´Asturies presenta nel Muséu la Siderurxa y la Minería de Castiella y Llión, en Sabero (Llión), la esposición "La dura infancia. Fotografía y trabayu infantil n'Asturies, 1885-1971.

El sábadu 5 de payares inaugúrase nel Muséu la Siderurxa y la Minería de Castiella y Llión, en Sabero (Llión), la esposición "La dura infancia. Fotografía y trabayu infantil n'Asturies, 1885-1971", entamada pol Muséu del Pueblu d'Asturies y formada por 40 fotografíes que pertenecen toes a los fondos del muséu xixonés. La esposición va permanecer en Sabero hasta finales del mes d'avientu.

Esta esposición púnxose por primer vegada en Xixón ente ochobre de 2015 y xunu de 2016, y dende esta última fecha tuvo nel Muséu Etnográficu del Oriente d'Asturies (Porrúa, Llanes), Ecomuséu de Somiedu y Casa de Cultura de Grau. Ye una esposición que tuvo enforma ésitu porque afaya una actividá oculta hasta agora, que nun dexa indiferente a naide, y que'l Muséu del Pueblu d'Asturies pudo llevar a cabu gracies a la so rica coleición de fotografíes. Dempués de Sabero, la esposición va siguir la so itinerancia poles cases de cultura de Cabranes, Infiestu y Navelgas (Tinéu) y pol Muséu Etnográficu de Quirós.

El Muséu la Siderurxa y la Minería de Castiella y Llión foi inauguráu en 2008 y pertenez a la Xunta de Castiella y Llión. Ta allugáu nuna gran nave construyida en 1846 pola Sociedá Palentina-Lleonesa de Mines, que foi la empresa que primero emplegó n'España un fornu altu al cok. Esta nave ye una copia d'una siderurxa qu'había en Alès (Francia), anque ye probable que dambes fueren proxectaes pol mesmu inxenieru. L'edificiu d'esti muséu ye d'un estraordinariu interés patrimonial, tantu poles sos característiques arquiteutóniques, como por tratase, probablemente, del más significativu restu calteníu n'España de los oríxenes de la siderurxa contemporanea. El primer estudiosu d'esta sociedá minera y siderúrxica foi Francisco Quirós Llinares, catedráticu xubiláu de Xeografía de la Universidá d'Uviéu, col artículu "La Sociedá Palentina-Lleonesa de Mines y los primeros fornos altos al cok d'España en Sabero (1847-1862)", publicáu na revista Estudios Xeográficos en 1971.