El Muséu de Belles Artes entama l'añu con dos grandes esposiciones

El Muséu de Belles Artes d'Asturies entama les sos actividaes con dos esposiciones de primer nivel: l'amuesa coles 33 obres maestres donaes a la institución pol empresariu ástur-mexicanu Plácido Arango, que s'inaugura'l 25 de xineru, y "Arte y Mito. Los dioses del Prado"una gran esposición con cincuenta obres procedentes del Muséu del Prado que va llegar a Uviéu'l 15 de marzu.

Nel Atriu de l'Ampliación instalóse yá'l "Retablu de la Flagelación de Leonor de Velasco" la primera de les nueves obres donaes por Plácido Arango.

El Director del Muséu de Belles Artes d'Asturies ,Alfonso Palacio, avanzó dellos detalles de l'amuesa que va sirvir de presentación de les 33 obres donaes , va inaugurase'l xueves, 25 de xineru y podrá visitase ente'l 26 de xineru y el 22 de xunetu. 29 pieces d'esta colección van esponese nel patiu del Palaciu de Velarde y les dos sales qu'arrodien esi espaciu; y otres trés van incorporase a les sales 26 y 27 de l'Ampliación, engarzaes cola esposición permanente. La obra que fai'l númberu 33 ye'l retablu, yá instaláu nel Atriu de l'Ampliación.

Alfonso Palacio anunció que doce d'eses 33 obres van quedar yá depositaes nel muséu tres l'amuesa, incorporándose nes sales de la colección permanente relatives a les sos respectives dómines; anque nun adelantó qué obres van permanecer nel muséu y cuáles van retornar al donante, que tien el derechu al usufructu vitaliciu de toles pieces.

Sobre la esposición " Arte y Mito. Los dioses del Prado ", informóse que l'amuesa, compuesta por mediu centenar de pintures y escultures, amás de dos medayes, va llegar a Uviéu'l 15 de marzu, y podrá visitase hasta'l 17 de xunu. Les obres van esponese na planta -1 de l'Ampliación, un espaciu qu'hasta'l próximu 11 de febreru ocupa la esposición "Construyir, habitar, existimar", de Dionisio González. " Arte y Mito. Los dioses del Prado " plantega un percorríu peles representaciones de la mitoloxía clásica al traviés de la Hestoria del Arte, con obres d'artistes tan renomaos como Rubens, José de Ribera, Francisco de Zurbarán o Corrado Giaquinto.

Venceyaes a eses dos esposiciones, el muséu entama un total de cuatro conferencies. El 22 de marzu, a partir de les 19.00 hores, el comisariu de " Arte y Mito. Los dioses del Prado ", Fernando Pérez Suescun, va faer un detalláu percorríu pola amuesa. Pela so parte, los fondos de la donación Arango van ser analizaos en fondura en trés conferencies: el 15 de febreru, a les 19.00 hores, Leticia Ruiz Gómez, Xefe del Departamentu de Pintura Española del Renacimientu del Muséu del Prado, va falar sobre les pieces del sieglu XVI; el 12 d'abril, de nuevu a les 19.00 hores, Javier Portús, Xefe del Departamentu de Pintura Española (hasta 1700) del Muséu del Prado, va falar sobre les pieces del sieglu XVII; a lo último, el 26 d'abril, de nuevu a partir de les 19.00 hores, José Lebrero, Director artísticu del Muséu Picasso de Málaga, va analizar les pieces d'Arte Contemporáneu.

Amás de estes dos grandes esposiciones, el Belles Artes sigue con dos programes de gran ésitu ente los visitantes: "La obra invitada", que va dexar, a partir del 19 d'abril, la presencia nel muséu de la obra "El Campeón" (1910), de Nicolás Soria; y los ciclos de cine. Al respective d' esti últimu programa, coordináu por Alfonso Palacio y Pablo de María, el muséu entama nel mes de febreru'l ciclu ""Luces y sombras. Infinito blanco y negro"", un ciclu qu'inclúi la proyección de cuatro filmes: " Pelirrojo ", de Julien Duvivier (7 de febreru, 18.00 hores); " Ascensor para el cadalso ", de Louis Malle (14 de febreru, 18.00 hores); "Celos", de Philippe Garrell (21 de febreru, 18.00 hores) y " La sombra de las mujeres ", tamién de Garrell (28 de febreru, 18.00 hores). Toles proyecciones van ser na versión orixinal subtitulada n'español, y van desendolcase nel salón d'actos del Muséu Arqueolóxicu, que dexa les sos instalaciones pa esti programa.

Les actividaes educatives, los talleres pa neños y la mocedá xunto a les visites guiaes completen el programa d' actividades del Nuséu de Belles Artes d'Asturies.