El fotógrafu llaniscu Baltasar Cue Fernández nel Muséu Pueblu d'Asturies

El Muséu del Pueblu d'Asturies recibe la donación de 28 negativos fotográficos en placa de cristal de xelatino bromuru (de 13 x 18 cm) del fotógrafu llaniscu Baltasar Cue Fernández fechos ente 1891 y 1894. El donante foi Carlos Suárez Cue, nietu del fotógrafu.

Nos llugares más insospechaos apaecen imáxenes de la nuesa hestoria guardaos polos familiares o amistaes d'artistes, creadores, artesanos... Esa apaición d'elementos del pasáu que formen el nuesu presente tienen nel Muséu del Pueblu d´Asturies el llugar pal so estudiu y conservación, la divulgación, conocencia y esfrute de les y los visitantes que s'averen a les sos instalaciones. Unu d'estos descubrimientos fueron estos 28 negativos fotográficos d'unu de los meyores y más orixinales fotógrafos asturianos del sieglu XIX: Baltasar Cue Fernández (1856-1918), autor d'una escepcional galería de tipos populares que foi dada a conocer como primicia en 1981 pol historiador de la fotografía española Lee Fontanella, y que foi motivu d'una esposición en Xixón, Uviéu, Llanes, Madrid (Muséu Nacional d'Antropoloxía), Santiago de Compostela (Muséu do Pobo Galego) y otres localidaes d'Asturies, además del llibru editáu pol muséu en 2012.

En 2008, el mesmu Carlos Suárez Cue yá donara al Muséu del Pueblu d'Asturies 129 negativos de plaques de cristal, a les qu'agora se sumen estos 28, formando en total un fondu de 157 negativos de Baltasar Cue. Son un importante conxuntu de negativos fotográficos del sieglu XIX, que n'Asturies son bien raros.

Baltasar Cue nació en Llanes nel senu d'una familia d'emigrantes. Él mesmu emigró a Cuba pero, lleváu por un espíritu propensu a la bohemia y l'aventura, tornó a Europa y establecióse en Londres y Paris, viaxando per Bélxica y Holanda, onde s'aficionó a la pintura y la fotografía. En 1889 tornó a Llanes. En 1891 abrió un estudiu fotográficu, que cerró en 1894. El so calter inquietu llevólu a tener distintos oficios y negocios .