El derbi asturianu vístese d'azul

El Real Oviedo ganó'l so primer partíu nel derbi asturianu ante'l Sporting de Xixón de penalti,  por un derribu del sportingista Javi Fuego a Marcos Sangalli nel minutu 37 de la primer metá que transformaria Sergio Tejera.
El partíu foi intensu nos primeros venti minutos onde se vieron les meyores ocasiones del alcuentru, primero sería Djuka con un disparu alloñáu tres el que reclamaría un posible penalti al topetar con un defensa del Uviéu al altor del brazu.
Otra ocasión vendría con un disparu del delanteru oviedista Blanco Leschuk que debutaba nesti alcuentru col Real Oviedo y que se va fora por bien poco de la portería de Diego Mariño.
Na segunda metá'l Real Oviedo tuvo meyor asitiáu sobre'l terrén de xuegu, cometiendo pocos erros en defensa, mientres al Sporting costába-y controlar el centru del campu pa compensar el xuegu oviedista.
Hubo bien poques ocasiones de gol durante'l segundu tiempu,por non dicir qu'apenes nenguna polos dos equipos.
Otru derbi más que se va pal casilleru del Real Oviedo onde paez ser que l'equipu carbayón tien-y coyida la midía al Sporting.
Va haber qu'esperar hasta'l 18 d'abril del próximu añu, a seis xornaes del final del campeonatu, pa que los dos equipos asturianos vuelvan xugar el derbi nel Estadiu Municipal El Molinón-Enrique Castro "Quini".
Con esta derrota'l Sporting queda segundu na clasificación con 12 puntos por detrás del RCD Espanyol y el Real Oviedo decimoterceru con 6 puntos.
El próximu rival del Real Oviedo va ser el Girona Futbol Club S.A.D nel Estadiu Municipal Montivili 'l sábadu a les ocho y media la tarde.
Pela so parte'l Real Sporting de Xixón recibe al Club Deportivu Tenerife en partíu que va ser retresmitíu n'abiertu por GOL TV, pendiente de confirmar día, domingu o llunes.