El Conservatoriu Valle del Nalón celebra ‘l 35 aniversariu
El Conservatoriu del Nalón entama esti llunes los actos del 35 aniversariu del centru y como anticipu a les actividaes que se desendolcarán a partir del próximu mes d'avientu, Charres, talleres y actuaciones musicales protagonicen les actividades d'esta semana cultural.
El primeru de los actos va ser el llunes 20 de payares cola inauguración de la esposición con motivu l' aniversariu, que tamién va incluyir a les siete la tarde un conciertu del alumnáu del centru y del grupu de chelos. El martes 21, a la mesma hora,tendrá llugar una mesa reonda d'homenaxe a "Forma Antiqua" cola participación de la orquesta Bocherinni. El miércoles 22 a partir les cinco la tarde van desarrollase talleres de construcción d'istrumentos musicales, concretamente de viola de gamba por Marc Sunyer Pelegri, profesor del centru . El xueves va ser el conciertu de Santa Cecilia cola entrega de diplomes y l'actuación del coru del Grau Profesional del Conservatoriu a les 19 hores. Y la selmana cultural pesllarase'l vienres con una visita guiada a la esposición a les 19.30 hores y, a partir de les 20 hores, una mesa reonda sobre los 35 años d'hestoria política y cultural nel valle del Nalón.
Los actos conmemorativos tornarán el vienres 1 d'avientu cola actuación del Coru de Voces Blanques del Nalón y va allargase hasta'l mes de mayu. Mientres esti tiempu va haber otros conciertos : la Big Band de la Escuela de Música de Llanera, el Cuartetu Arpegio, Entrequatre, Danzasturias, la orquesta del Conservatoriu de L.luarca; la Escuela de Música d'Uviéu, Eva Argüelles, Dimas Coalla y Zulima Camblor; los alumnos y exalumnos del conservatoriu, el quintetu D'Acappo y La Ocas (Orquesta de Cámara de Sieru). Amás de música, el grupu de violonchelos del conservatoriu va presentar el so discu y desarrollaranse charres a cargu de Margarita Braña, María Encina Cortizo, Ana Lobeto, Mapi Hernández y Tania Quintana.