Estrenu de la ópera de Rossini 'Il Turco in Italia'nel Teatru Campoamor

Esti domingu 7 d'ochobre, a les 19 hores, y los díes 9 11, 12 y 13 , a les 20 hores, va representase nel Teatru Campoamor esta ópera de Rossini, nuna nueva coproducción de la Ópera d'Uviéu, el Teatru del Capitoliu de Toulouse y el Teatru Municipal de Chile. So la dirección escénica d'Emilio Sagi y la dirección musical d'Iván López Reynoso, principal director convidáu d'Uviéu Filarmonía, 'Il Turcu in Italia' va tar interpretada pola soprano Sabina Puértolas, como Fiorilla; el barítonu baxu Simón Orfila, nel papel del príncipe Selim; el barítonu Alessandro Corbelli, nel papel de Don Geroncio; el tenor David Alegret, como Don Narcisu; el tamién barítonu Manel Esteve, nel papel de Prosdócimo; la mezzo Laura Vila, como Zaida, y el tenor David Astorga como Albazar. Fora d'abonu, la función del 12 d'Ochobre, enmarcada en 'Vienres Ópera' van actuar Sara Blanch nel papel de Fiorilla, Ricardo Seguei, como Selim, Pablo López (Don Geroncio), y Juan de Dios Mateos (Don Narcisu), y Pablo Gálvez (Prosdócimo).

Coquetéu, seducción, equívocos, amores ensin fronteres y diversión n'estáu puru. La ópera de Rossini narra les desventures del príncipe turcu Selim que viaxa a Italia para afayar nuevos placeres. El personaxe de Prosdocimo escribe'l so drama coles mesmes que se desenvuelve l'acción de la ópera. Con un xuegu inéditu hasta'l momentu de teatru dientro del teatru, el poeta manipolia al so antoxu, como si fueren marionetes, al restu de personaxes.

Rossini y el so libretista entemecen lo verdadero y lo falso, la realidá y la ficción, creando una propuesta teatral d'una estraordinaria modernidá que se complementa con una música llena d'encantadores momentos concertantes y visos d'inspiración melódica. Una gran bufonada que nos recuerda costantemente al meyor Rossini, nel añu en que se cumple'l 150 aniversariu de la so desapaición. Emilio Sagi, director d'escena de Il turcu in Italia ambienta l'acción nel Nápoles de los años 50 y 60, recreando la lluz, l'allegría de vivir y el pintoresquismo de la ciudá italiana.