DÍA EUROPÉU DEL ARTE RUPESTRE N’ASTURIES
La Conseyería de Cultura, Política Llingüística y Turismu programó
dellos actos para celebrar el Día Européu del Arte Rupestre, que se
conmemora güei 9 d'ochobre.
Asina, el Centru d'Arte Rupestre Tito Bustillo va ufiertar a les 13:00 hores l'actividá La maleta viajera, una demostración práctica qu'esplica cómo se ficieron hai miles d'años les pintures y grabaos en numberoses cueves europees.
A la mesma hora, nel Parque de la Prehistoria va entamase una visita guiada pola corralada d'animales, onde habiten bisontes europeos, caballos tarpanes y Przewalski, gamos, venaos y uros de Heck; especies qu'apaecen en pintures y grabaos de delles de les répliques de les cueves europees de la galería y la cueva de cueves del equipamientu tebergán.
Dambes actividaes tienen places tasaes y fai falta adquirir les entraes al traviés de les páxines web www.centrotitobustillo.com y www.parquedelaprehistoria.es.
Pela so parte, el Muséu Arqueolóxicu d'Asturies va acoyer la conferencia Arte rupestre n'Asturies: relatos d'un sieglu de descubrimientos, impartida por Miguel Polledo, guía de Patrimoniu Cultural que trabaya en Tito Bustillo. La charra, que va empezar a les 19:00 hores, plantégase como un percorríu pol descubrimientu, identificación y estudiu d'esti tipu d'arte na comunidá a lo llargo del sieglu XX, dende los descubrimientos pioneros del Pindal, La Peña, El Buxu o Peñatú, a los grandes d'El Pozu'l Ramu, Llonín y La Covaciella.
El Día Européu del Arte Rupestre celébrase en caún de los llugares pertenecientes a l'Asociación Caminos d'Arte Rupestre Prehistóricu, certificada en 2010 como ruta cultural del Conseyu d'Europa, y na que ta integrada Asturies.
El 9 d'ochobre foi escoyíu pol Conseyu d'Europa y la Comisión Europea como Día Européu del Arte Rupestre, una fecha bien venceyada a la hestoria de la cueva de Altamira. Nesi día, fai 117 años, ta fechada la carta de Émile Carthailac, una de les más altes autoridaes de la comunidá científica internacional, qu'espresaba per primer vegada l'aceptación oficial de les dataciones paleolítiques que Sautuola fixera yá en 1880 nos sos "Curtios Apuntes" de les capacidaes intelectuales de los humanos prehistóricos y de la esistencia del arte rupestre de los primeros europeos. Na misiva, Cartailhac definía la cueva de Altamira como «la más guapa, la más estraña, la más interesante de toles cueves con pintures».
El Día Européu del Arte Rupestre pasa a formar parte de los eventos que s'integren nos Díes Europeos del Patrimoniu. Les distintes celebraciones van llevar a cabu en cada unu de los sitios pertenecientes a l'Asociación Caminos d'Arte Rupestre Prehistóricu, certificada en 2010 como Ruta Cultural del Conseyu d'Europa, una de les mayores redes de sitios arqueolóxicos, con 161 llugares ente los que s'atopen museos y centros d'investigación, centros d'interpretación, sitios con arte rupestre, etc.