Convocatoria del títulu de Formación Profesional Dual de Técnicu Superior en Guía, Información y Asistencia Turística enfocáu al Patrimoniu Industrial

La Escuela de Turismu d'Asturies y el Grupu HUNOSA ponen en marcha un títulu de Formación Profesional Dual de Técnicu Superior en Guía, Información y Asistencia Turística enfocáu al Patrimoniu Industrial
•La matrícula puede formalizase ente'l 15 de xunu y el 11 de setiembre y les clases van empezar el próximu 19 de setiembre
•El nuevu títulu de FP y el yá anunciáu d'Espertu universitariu en xestión y usu turísticu del patrimoniu industrial y mineru van presentase en FETUMI

La Escuela de Turismu d'Asturies, dependiente de la Facultá de Turismu d'Uviéu, y el Grupu HUNOSA ponen en marcha un títulu de Formación Profesional, integráu dientro de la FP Dual, de Técnicu Superior en Guía, Información y Asistencia Turística enfocáu especialmente al Patrimoniu Mineru ya Industrial. El programa, que se va presentar na próxima Feria de Turismu Mineru ya Industrial (FETUMI), pretende formar profesionales que puedan aprovechar les oportunidaes que ta xenerando'l crecimientu del turismu industrial y mineru n'Asturies y tresformales n'empléu y actividá económica.
Esti módulu de Formación Profesional ta destináu a estudiantes que fagan el bachiller, anque nun ye necesaria la EBAU. La Facultá de Turismu y el Grupu HUNOSA diseñaron el programa cuntando col respaldu de Fade, al traviés de OTEA, patronal d'Hostelería y Turismu del Principáu, de l'Asociación d'Arqueoloxía Industrial Incuna y del SOMA.
Tanto'l títulu de Formación Profesional de Técnicu Superior en Guía, Información y Asistencia Turística como'l d'Espertu universitariu en xestión y usu turísticu del patrimoniu industrial y mineru, anunciáu fai escases feches col aval de la Universidá d'Uviéu, van presentase na próxima Feria de Turismu Mineru ya Industrial (FETUMI), que se celebra nel pozu Sotón esti fin de selmana, 2 y 3 de xunu, sábadu y domingu. Ellí, en FETUMI, la Facultá de Turismu d'Uviéu y l'Escuela de Turismu d'Asturies, que depende de la primera, van cuntar con un stand nel que les persones interesaes van poder recibir información sobre dambes titulaciones.
El títulu de Técnicu Superior en Guía, Información y Asistencia Turístiques Espertu en Patrimoniu Industrial, de cálter oficial y con validez en tol territoriu nacional, tien un nivel de Formación Profesional de Grau Superior y, con una duración 2.000 hores, enmárcase na familia profesional d'Hostelería y Turismu.
Impartíu por docentes titulares de la Escuela de Turismu d'Asturies y técnicos del Grupu HUNOSA, inclúi formación especializada impartida por profesionales del patrimoniu industrial espertos en: réxime xurídicu, urbanismu y ordenación del territoriu, protección del patrimoniu, arquitectura industrial, técniques de documentación, rehabilitación de patrimoniu industrial, usos del patrimoniu, seguridá en parques mineros y mines abiertes al públicu, dinamización d'árees industriales, espresión gráfica y arquitectónica.
L'oxetivu ye capacitar a los alumnos pa planiar, promocionar ya informar sobre destinos turísticos de base territorial, emponiendo y asistiendo a viaxeros y clientes nos mesmos, constituyendo una ferramienta básica pal desenvolvimientu del profesional del patrimoniu, dientro del espaciu industrial. El programa docente inclúi l'estudiu del patrimoniu industrial mineru nel Plan Territorial Especial d'HUNOSA, el diseñu y cambéu de productos turísticos de base territorial pa satisfacer les mires de la demanda turística y rentabilizar los recursos y l'ufierta de servicios de la redolada, nuevos usos del patrimoniu industrial, propuesta d'acciones de promoción y comercialización del patrimoniu industrial mineru y otros recursos turísticos con vista al so llanzamientu o afitamientu, atención de continxencies ya imprevistos n'espacios turísticos de la redolada minera industrial y otros, etc.
L' oxetivu de la formación ye  que los alumnos se conviertan en profesionales capacitaos pa trabayar tantu per cuenta propia como ayena, lo mesmo que de ocupar puestos n'alministraciones públiques o entes de característiques similares (consorcios, patronatos de turismu, etc.). Les ocupaciones y puestos de trabayu más relevantes son: guía n'allugamientos d'interés mineru industrial y bienes d'interés cultural, guía local, guía acompañante, informador turísticu, xefe d'oficines d'información, promotor turísticu, técnicu d'empresa de consultoría turística, axente de desenvolvimientu turísticu local, asistente técnicu en medios de tresporte terrestre o marítimu, en terminales (aeropuertos, puertos y aeropuertos), en feries, congresos y convenciones; y encargáu de servicios n'eventos.
Too ello escuérrese al traviés d'un completu conteníu qu'inclúi materies venceyaes a conocer la estructura del mercáu turísticu nel contestu de l'actividá industrial; realidá socioeconómica del sector turísticu, evolución histórica y situación actual, analizando les sos implicaciones na redolada minera industrial; marketing turísticu, especificidaes de la comercialización, investigación y espardimientu del patrimoniu industrial, conocencia de los valles mineros d'Asturies como destín turísticu; figures profesionales, la so regulación y caracterización, inclúi'l diseñu d'itinerarios , accesibilidá nos recursos, información afecha; idiomes; etc. Los alumnos podríen esfrutar de práctiques nel Grupu HUNOSA o en centros venceyaos a la marca Mines d'Asturies.
El cursu va desenvolvese durante'l próximu añu escolar y la matrícula puede formalizase ente'l 15 de xunu y el 11 de setiembre nes oficines de la Facultá de Turismu d'Uviéu, Polígonu Industrial de Olloniego o nel teléfonu 985966035.
L'anunciu de la puesta en marcha del títulu de Técnicu Superior en Guía, Información y Asistencia Turística espertu en Patrimoniu Mineru ya Industrial llega selmanes dempués de que La Universidá d'Uviéu aprobara, a solicitú tamién de la Facultá de Turismu d'Uviéu y el Grupu HUNOSA, un títulu d'Espertu universitariu en xestión y usu turísticu del patrimoniu industrial y mineru. Un títulu de cálter semipresencial y con 25 places empobináu a titulaos supetiores que deseyen especializase y a profesionales que yá tienen presencia nel sector o interesaos n'asitiase nel mesmu.
Les clases presenciales d'esti títulu d'espertu universitariu van tener llugar los vienres pela tarde y los sábados pela mañana ente los meses de setiembre de 2018 y xineru de 2019. La preinscripción va abrise'l próximu 1 de xunu hasta'l 18 d'agostu de 2018 y la matrícula (1.300 euros), va poder formalizase ente'l 13 y el 19 de setiembre. El cursu ta valoráu en 27 creitos del Sistema Européu de Tresferencia y Acumulación de Creitos (ECTS).