Comicsan el 14 d'abril en Samartín del Rei Aurelio

Sotrondio acueye'l 14 d'abril el programa d'ociu Comicsán con xuegos de rol, cosplay o jugger.

Sumándose a la moda de los alcuentros d'ociu alternativu que tán trunfando nes grandes ciudaes, el Conceyu de Samartín del Rei Aurelio llanza Comicsán, un programa cultural y d'entretenimientu pensáu pal públicu xuvenil, pero abiertu a toles edaes, que se va cellebrar el 14 d'abril, en Sotrondio, con un tornéu de jugger, xuegos de rol, concursu de cosplay, videoxuegos, espaciu virtual y caza pokemon, amás d'una amuesa de cómics y revistes manga. La iniciativa, que foi presentada el llunes en rueda de prensa, cuntó cola collaboración de rapazos del conceyu.
El programa, que parte de les Conceyalíes de Cultura y Mocedá, tien como oxetivu "responder a les nueves demandes d'ociu con una ufierta recreativa variada que bebe de les actuales tendencies nel ámbitu de los xuegos", esplicaron fontes municipales. Ye, a última hora, "un apueste novedosu d'ociu na nuesa contorna que va más allá del divertimentu en cuantes que promueve la creatividá, fomenta la lletura y el desarrollu de mañes", repostiaron.
Les actividaes arranquen el sábadu 14 d'abril a partir les diez  la mañana cola cellebración del I Tornéu Jugger, nel Campu d'El Florán, que va desarrollase hasta les seis  la tarde. Trátase d'un deporte d'equipos, inventáu n'Alemaña ente 1989 y 1995, que combina elementos del rugby y l'esgrima. "Ye una competición que se basa nes habilidaes y l'estratexa, pero non na fuerza, regulada con unes bases que prohiben los golpes y el contactu físicu ente xugadores", indicaron les mesmes fontes. Pa esta primer edición inscribiéronse seis grupos de: Uviéu-Nalón, Castrillón, Avilés, Corvera y Xixón.
El gruesu d'actividaes d'esti programa va tener llugar nel Aula Cultural La Plaza, en Sotrondio, a partir de les cuatro y media la tarde. Va haber un espaciu reserváu a los xuegos de rol, y va entamase un concursu de cosplay, a partir de les 18,00 hores, "que consiste en vistise con disfraces y traxes  imitando personaxes de ficción del mundu del cómic, el cine, la lliteratura, l'animación xaponesa (anime), les historietes maga y los videoxuegos", esplicaron.
Los asistentes a esti primer alcuentru Comicsán van poder esfrutar tamién de les videoconsoles, la realidá virtual en 3D, xuegos de mesa de los años ochenta y un concursu de caza pokemon pola localidá de Sotrondio, a partir de les 16,30 hores.
Amás, dende'l 9 d'abril y hasta el 20 del mesmu mes, la Casa de la Mocedá va acoyer una Amuesa de cómics, revistes manga, xuegos y funko pop (xuguetes de cultura pop), que podrá visitase n'horariu de mañana y tarde.