Cinesán Festival Internacional de Curtiumetraxes de Samartín del Rei Aurelio
Cinesán
Festival Internacional de Curtiumetraxes de Samartín del Rei Aurelio
El Festival Internacional de Curtiumetraxes de Samartín del Rei Aurelio (Cinesán) empieza esti domingu con una trentena de curtios na sección oficial. La gala d'inauguración que se celebra esti 29 d'ochobre nel Teatru Municipal de Samartín del Rei Aurelio en l'Entregu va cuntar cola presencia del director asturianu Samu Fuentes, que llueu estrena la so nueva película protagonizada pol conocíu actor Mario Cases, "So la piel de llobu".
La sección asturiana del festival cunta con ocho curtios escoyíos: "Ihesa", "Llegar", "La Clase", "Parque", "Sonri", "Agostu", "Negrea" y "Ad-Vientu". Les ocho producciones van proxectase'l mesmu día de la inauguración y opten al premiu de 400 euros.
Ente les 1.179 obres procedentes d'hasta 30 países distintos, un total de 22 curtios fueron escoyíos pol xuráu pa competir na sección oficial. Ente'l llunes y el vienres de la próxima selmana, les obres qu'opten a los 1.000 euros del premiu van proxectase na Casa de la Mocedá, l'Aula Cultural La Plaza y el mesmu Teatru Municipal. Ente elles hai dos producciones estranxeres procedentes de Bélxica y Francia.
L'abanicu de trabayos de la cartelera del festival ye bien ampliu, con producciones independientes y otres de mayor presupuestu, que presenten relatos de xéneros diversos, pero con protagonismu de temes sociales.
El festival va durar hasta'l domingu 5 de payares con una sección paralela na que se van proxectar otros llargumetraxes nel marcu de la sección Estaya Temática, dedicada nesta ocasión al thriller, con películes como "Crudo", de la francesa Julia Ducournao, o "Train to Busan", de Yeon Sang-ho. Coles mesmes, nel apartáu Pioneros del cine, van proxectase comedies de Chaplin o Buster Keaton como protagonistes xuntu con producciones empobinaes por Georges Méliés y Segundu de Chomón.
Nel espaciu "Off Cinesán" desendólquense distintes actividaes como un taller de guión audiovisual, una conferencia sobre cine y muyer, una esposición sobre'l cine nes cuenques mineres y otra segunda amuesa a cuenta de la hestoria del cine español. La gala clausura celebrarse'l 11 de payares nel Teatru Municipal de L'Entregu. Nella concederase tamién un premiu valoráu en 600 euros a la meyor interpretación.