CINESAN.Festival de Curtiumetraxes de Samartín del Rei Aurelio
CINESAN va camudar el certame de curtios por un festival con mayor variedá de conteníu
El festival incorpora una sección homenaxe al cine mudu, llargumetraxes, meses reondes y esposiciones.
La Conceyalía de Cultura va celebrar la próxima seronda la primer edición de CINESAN, un festival de curtiumetraxes que sustitúi al hasta agora certame de curtiumetraxes de San Martín ya incorpora novedaes y variedá en cuanto al conteníu, pero calteniendo la mesma filosofía de promocionar y espublizar l'arte cinematográficu na modalidá de los curtios, como hasta agora.
La principal novedá pasa pol cambéu del modelu de xestión que pasa de certame al de festival, esto ye, los curtiumetraxes que participen en CINESAN van ser escoyíos direutamente pola organización.
Otra de les novedaes tien que ver cola distribución de los curtios. Magar el Teatru Municipal va ser l'escenariu principal pa la exhibición de los trabayos, van incorporase otres instalaciones culturales, como la Casona del Bravial en Blimea y l'Aula Cultural La Plaza y Casa la Xuventú en Sotrondio.
Tocantes a la estructura, el festival va tar estremáu en dos grandes secciones: Sección Oficial de Curtios a Concursu y Sección Día de Curtios Asturianos. Na primera van proyetase los curtiumetraxes escoyíos pol xuráu, que van ser los que participen a concursu, almitiéndose cualquier procedencia col requisitu de que les producciones grabárense nel últimu añu. De la mesma, esta sección oficial va tener un apartáu denomináu Estaya Temática, pa la proyección de curtiumetraxes d'un xéneru determináu, qu'en 2017 va dir dedicáu al thriller. La sección asturiana, pela so parte, va acoyer la proyección de curtiumetraxes rodaos n'Asturies o empobinaos por cineastes asturianos.
Per otra parte, el festival incorpora otros apartaos complementarios que tamién son nuevos: Homenaxe a los Pioneros del Cine, pa la exhibición de cine mudu; Off Festival, dedicáu a la celebración de meses redondes, conferencies, esposiciones o cursos de formación; y Llargumetraxe, acutáu pa la proyección d'una película que rinda tributu a dalgún director/ra o actor o actriz o que sía d'interés xeneral por otros motivos.
Tocantes a los premios del festival contemplen trés galardones na sección oficial: Meyor Curtiumetraxe, Meyor Actuación y Premiu Especial del Públicu, y unu na sección asturiana, Meyor Curtiu Asturianu.