CINESAN 2020

Samartín del Rei Aurelio acueye la FIESTA DEL CURTIUMETRAXE a partir d'esti xueves.

El IV Festival de Curtiumetraxes CINEAN va empezar el xueves 29 d'ochobre cola presentación del llargumetraxe 'El Gabinete del Doctor Caligari', nel Teatru Municipal, como antoxana a la exhibición de los curtios escoyíos a concursu: una docena, na Sección Oficial, ya igual númberu, na Sección Asturiana, escoyíos d'un total de 1.175 curtiumetraxes presentaos.
Los curtios presentaos, que superen en númberu a los rexistraos l'añu pasáu, son d'ámbitu nacional, pero tamién hai un participación significativa internacional que toma a 38 países. Prácticamente tolos de la Unión Europea (Francia, Alemaña, Grecia o Polonia), toa América, dende Canadá a Arxentina; ente otros países como Indonesia, Corea del Sur, India, Exiptu o Irán.
Los xéneros son variaos y van dende'l drama a la comedia, el thriller o'l cine social, con técniques bien profesionales en dellos trabayos y amateur, n'otros. De la mesma, ente actores y actrices noveles apaecen reconocíos intérpretes del cine y la televisión.
El concursu de curtios ye la esencia del festival. Los curtios asturianos, van proyectase nuna única xornada, el domingu 1 de payares, nos cines Arte Siete Nalón, en dos sesiones: a les 17 hores y a les 19,30 hores.
Tocantes a los doce curtios que compiten na Sección Oficial, van proyectase nos cines Arte Siete Nalón, los díes 2, 3 y 4 de payares, a les 19 hores, a razón de cuartu curtiumetraxes por sesión. Tolos curtiumetraxes a concursu van optar a los premios Meyor Curtiu Sección Oficial, Meyor Curtiu Asturianu y Meyor Interpretación.
Por cuenta de la pandemia de la covid, nesta edición suspéndense temporalmente les secciones 'Estaya temática' y 'Homenaxe a', pero se caltienen Cinesan Infantil, cola proyección de la película Trolls 2, el vienres 30 d'ochobre, a les 18 hores, nos cines Arte Siete, y Cinesan Halloween, col llargumetraxe Xóvenes y Bruxes, el sábadu 31 d'ochobre, a les 20 hores, nos mesmos cines.
Al respective de la clausura de Cinesan, va tener llugar el sábadu 7 de payares, a les 19 hores, con una gala d'entrega de los premios, na que se van proyectar los curtiumetraxes ganadores, metanes un espectáculu d'humor conducíu pol artista Alberto Rodríguez.
Consulta tola programación al detalle en:  https://www.smra.org/cinesan-2018

o calcando na imaxen.