Cine n'Uviéu: RADAR nel Teatru Filarmónica

La programación cinematográfica de la Fundación Municipal de Cultura d'Uviéu vuelve al Teatru Filarmónica. Va trenta selmanes, la crisis sanitaria de la COVID-19 interrumpió'l ciclu RADAR. La cartelera que se programa na capital asturiana baxo'l sellu SACO torna esta selmana colos títulos que'l públicu nun pudo esfrutar en marzu, películes del ciclu dedicáu a John Ford y a la paranoya contemporanea, amás d'una muestra del cine contemporaneu más aclamáu por crítica y públicu. RADAR vuelve esti xueves 8 d'ochobre con un Richard Burton n'estáu de gracia n'El espía que surdió del fríu. Y va tener la oportunidá de vese a les 17:00 y a les 20:00 hores yá que esta nueva edición de RADAR incorpora'l doble pase.
RADAR sigue siendo gratuitu, pero'l públicu tendrá de retirar les invitaciones en https://entraes.oviedo.es/ 24 hores antes de cada sesión.

P'aportar a la Filarmónica, el públicu tendrá de presentar tanto la invitación impresa como'l so DNI. Amás, ye obligatoriu l'usu de mascarilles mientres la sesión. Con esta fórmula, la programación cinematográfica d'Uviéu cumple coles midíes de seguridá establecíes poles autoridaes sanitaries.

Hasta'l 27 d'avientu, el Teatru Filarmónica va mostrar 20 producciones d'España, Francia, Rumanía, Estaos Xuníos y Palestina, ente otres cinematografíes. RADAR va cerrar l'añu con Plácido, de Luis García Berlanga, xuniéndose asina al homenaxe que se prepara pol centenariu de la so nacencia, que se va cumplir en 2021. Esta allocada sátira navidiega ta coescrita pol xenial Rafael Azcona y protagonizada por nomes imprescindibles del cine español como José Luis López Vázquez, Elvira Quintillá, Julia Caba Alba, Amparo Soler Lleal, Manuel Alexandre y Luís Ciges.

Consulta tola programación calcando na imaxen.