Cine nel Niemeyer

Nel ámbitu cinematográficu nel Centru Niemeyer el mes de mayu va venir marcáu pol documental, con trés de les seis proyecciones programaes. "Una neña", que podrá vese 'l xueves 6 de mayu ye un emotivu documental francés sobre una neña que nació nun cuerpu de neñu y nel que s'aborda'l refugu de parte de la sociedá énte esta realidá.

Pela so parte, "La cai de l'agua" (domingu 9 de mayu) trata la figura de Benjamina Miyar, una fotógrafa, reloxera y lluchadora antifranquista.

Finalmente, "Vaca muxendo ente ruines" (30 de mayu) ye la última producción de Ramón Luis Bande y con ella avérase a un momentu clave na hestoria d'Asturies, agostu de 1937, al traviés de la figura de Belarmino Tomás.

El mes de cine va completase cola cabera de les proyecciones del ciclu dedicáu a Wong Kar-Wai, al traviés del llargumetraxe "2046" (xueves 13 de mayu); el romance francés "Ente nós" (domingu 16 de mayu), sobre dos muyeres xubilaes, secretamente namoraes, que pa la so redolada nun son más que vecines; y el drama suizu "L'horizonte" (xueves 20), una cinta que llogró los premios a meyor película y meyor guion del cine suizu de 2020.
Toles proyecciones van tener llugar a les 19:00. Cada entrada tien un preciu de 5€ (3€ pa socios del Club Cultura que merquen les sos entraes hasta'l día anterior a la proyección) y tán disponibles nos puntos de vienta : taquilla del Centru Niemeyer , na so páxina web y nes recepciones de Llaboral Ciudá de la Cultura y CITPA Uviéu.