Ciclu de Cine nel Muséu de Belles Artes d'Asturies
La llegada al Muséu de Belles Artes d'Asturies de les 33 obres que componen la donación fecha por Plácido Arango supón un estraordinariu arriquecimientu de les sos colecciones tantu de pintura antigua como arte contemporaneu.
Celebrando esti acontecimientu'l Muséu de Belles Artes d'Asturies propón cuatro películes inspiraes en cuatro de les obres d'esa donación. Siguiendo'l rastru de Buffalo, cantor de Montmartre d'Ignacio Zuloaga, vamos viaxar a la bohemia parisina del sieglu XIX. Ellí vamos descubrir como viven los artistes entregaos a la creación, pero escasos de recursos. Una vida bohemia, cargada de lluces y con munches solombres, que se queda trescalada nes humildes buhardilles de Montmartre o del barriu llatinu. Vida bohemia. 3 de marzu a les 18:00 hores.
Eduardo Arroyo reflexa nel so llenzu Tou la ciudá fala d'ello a un gánster col so indixebrable sombreru que despinta parte de la so cara con un antifaz. Un delincuente que s'apaez ente los caleyones d'una gran ciudá, escenariu habitual de numberoses películes de cine negru. Por esa razón Nueva York, vista como nunca se filmara antes pal cine, va ser tamién protagonista d'esti ciclu como escenariu palpitante d'una trama criminal. La ciudad desnuda. 10 de marzu a les 18:00 hores.
Variando totalmente 'l rumbu atopamos la pintura El cura de pueblu, de José Gutiérrez Solana. El cine retrató en numberoses ocasiones la figura del pastor espiritual d'una comunidá, si hai un director esmolecíu poles cuestiones metafísiques ye ensin dulda 'l maestru Bresson. Por ello vamos cruciar les miraes d'estos dos sacerdotes rurales, llonxanos na forma, pero bien próximos a xulgar polo que destilan les sos miraes cansaes.Diariu d' un cura rural. 17 de marzu a les 18:00 hores.
Una sala de billar ye l'escenariu escoyíu pa concluyir el periplu. El Monte Maraviyosu d'Equipu Crónica convídanos a suminos nesi ambiente máxicu nel que puede asoceder lo inesperao. Una obra maestra como esta sírvenos d'escusa pa rindir homenaxe y realcontranos con un director que pudo tar ente los más grandes, Robert Rossen.El buscavidas.24 de mayu a les 18:00 hores.
Consulta'l programa del ciclu de cine calcando na imaxen.