CAMFED, Campaign for Female Education Premiu Princesa d' Asturies de Cooperación Internacional 2021

CAMFED, Campaign for Female Education, ye una organización internacional que dende la so creación por Ann Cotton en 1993 trabaya na erradicación de la probeza y desigualdá nel África subsahariana, por aciu la inversión na educación de les neñes y el empoderamientu de les xóvenes.

CAMFED, consorciu internacional de nueve entidaes n'África, Australia, Estaos Xuníos, Canadá y el Reinu Uníu, cuenta anguaño con más de 330 emplegaos y unos 150 000 voluntarios, que faen trabayos de campu en Zimbabue, Ghana, Malawi, Tanzania y Zambia y actúen en más de 160 comunidaes ameyorando les condiciones de vida de más de cinco millones de neñes y neños.

Pa lluchar escontra la esclusión de les neñes y muyeres de les oportunidaes que brinda la educación, CAMFED, n'asociación con mecenes y comunidaes rurales, y al traviés del lideralgu de l'Asociación CAMFED o CAMA (poles sos sigles n'inglés) -organización creada en 1998 poles primeres cuatrocientes beneficiaries de la Campaign for Female Education-, impulsa'l cambéu sistémicu con cuatro enfoques:

- equidad y xusticia social (educación como un drechu humanu fundamental que nun tien de ser negáu a neñes y muyeres)

- desenvolvimientu económicu (reinversión en comunidaes desfavorecidas)

- lideralgu de les muyeres (cambéu de normes socioculturales, protección y empoderamiento de neñes marxinaes)

-   y acción contra'l cambéu climáticu (transición escontra práctiques respetuoses col clima y amenorgamientu de futures emisiones de carbonu).

Sicasí, la principal característica que fai destacar CAMFED frente a otres organizaciones del mesmu perfil ye la implementación d'un modelu que non solo favorezca l' ccesu a la educación de neñes marxinaes, sinón que tamién les sofita na transición escontra la vida adulta y nes nueves oportunidaes empresariales pa la creación d'empléu y crecimientu d'ingresos en zones rurales.

Gracies a CAMA y la so rede de más de 157 000 ex-alumnes, el númberu de beneficiaries de CAMFED sigue creciendo, ya que caúna de les ex-becaries patrocina y sofita nos sos estudios a unes trés neñes de promediu.

El columnista del The New York Times Nicholas Kristof describió esta dinámica nel so artículu «Choose a Gift That Changes Lives» como «una máquina de movimientu perpetuu... un ciclu virtuosu que crez col tiempu».