Bocetos de la mina y los mineros de Luis Felipe Capellín na Casa Los Alberti en Ciañu

Hasta'l 6 de marzu La Casa los Alberti de Ciañu en Llangréu acueye la esposición Bocetos de la Mina y los Mineros de Luís Felipe Capellín, una serie de 120 esbozos, fechos toos ellos con llápiz de grafitu, bolígrafu y carboncillu, tienen una midía de 11x11 centímetros sobre un soporte de cartón de 70x50 centímetros.

Los esbozos busquen suxerir más qu'afirmar y traten de treslladar una historia que n'Asturies, paez tar a piques de rematar y na que los castilletes, n'otres dómines símbolu de vida y de riqueza, güei tán convirtiéndose nun recuerdu nel que, xunto a los sueños por una vida meyor, tamién representen el dolor y la muerte.

Pero la mina y los mineros nun acaben n'Asturies y con mui poques diferencies, malapenes perceptibles, ye'l mesmu trabayu qu' en cualquier parte del mundu llevaron y lleven a cabu, tovía güei, homes que dexaron la salú, y en munchos casos la vida a cambiu de un salariu que, poques veces, fue xustu.

L'autor,Luís Felipe Capellín, rinde homenaxe a toos ellos y a les sus families con estos bocetos.