Alberto Vázquez algama'l Premiu Alfonso Iglesias de Cómic cola obra El sol na escombrera

Alberto Vázquez, artista gráficu, dibuxante, cortometrista y documentalista algamó'l XII Premiu Alfonso Iglesias cola obra El sol na escombrera.

Según el xuráu: "trátase d'una obra que cunta la vida de José Fernández Sánchez, un neñu asturianu de la guerra, col enfoque realista d'un tema mui poco tratáu poles artes visuales, que l'autor resuelve con una propuesta sobria, un estilu de dibuxu característicu y personal, asentáu. Too ello envueltu nun tonu de nostalxa qu'espeya perfectamente el de les memories del protagonista que se tomen como referencia pa construir la obra".

Alberto Vázquez repite premiu nun galardón qu'algamó nel añu 2017 ,na so novena edición, cola obra Los llazos coloraos, nel que fae un percorríu peles fuelgues de la minería asturiana comprendíes ente los años 1957-1965 (dende la primer fuelga xeneral nel Nalón, pasando pela fuelga de 1962 que s'estiende a mediu país, hasta los asaltos a la Comisaría de Mieres y al edificiu del sindicatu vertical en Sama).