Animal Locomotion Variaciones en torno a Eadweard Muybridge

El Muséu Barjola de Xixón acueye Animal Locomotion, Variaciones en torno a Eadweard Muybridge, una esposición de l'artista Fernando Gutiérrez na que desenvuelve un trabayu d'animación site-specific pa la Capiya del Muséu Barjola a partir de la enciclopedia visual de movimientos del pioneru de la cronofotografía Eadweard Muybridge. Nesti proyectu l'artista investiga'l movimientu de naturaleza secuencial, la repetición mecánica y la fascinación poles múltiples combinaciones visuales dientro d'un procesu de montaxe y basáu nel colax aleatoriu de distintos ciclos de secuencies.Eadweard Muybridge, fotógrafu ya inventor angloamericanu, constituyó un de los revulsivos qu'aceleró la modernidá y les aspiraciones contemporanees na comprensión de la percepción visual del movimientu, xuniendo ciencia y arte, coles mesmes qu'asitiaba les bases del cine coles sos investigaciones. La so obra Animal Locomotion de 1887 sigue siendo una obra de referencia imprescindible sobre'l movimientu del cuerpu nos seres vivos.
Nesta singular obra Muybridge utilizaba una serie de 12 cámares orixinalmente creaes pal estudiu científicu del movimientu. El so interés yera documentar los intervalos
de desplazamientu d'un cuerpu nun curtiu ralu de tiempo,acutando 12 momentos imperceptibles hasta la fecha.
El so zoopraxiscopiu ordenaría eses secuencies estátiques revelando los sos ritmos, como tamién lo fadría'l cine a partir de 1895.
Fernando Gutiérrez xuega colos ritmos y bucles na obra de Muybridge,utilizando'l cuerpu como fragmentu nuna sucesión de movimientos subsecuentes, compulsivos ,irracionales y aburuyando la so cadencia orixinal o la so velocidá interna escontra'l extrañamientu, la molición o  lo mostruoso.
L'estensu trabayu de Muybridge muestra un volume casi obsesivu de semeyes onde homes, muyeres, neños y animales, cuerren, salten y desendolquen actividaes atlétiques y mundanes señalaes por una estética científica , desapasionada na so racionalidá.
Estes imaxenes analítiques contrasten coles reformulaes por Fernando Gutiérrez nos sos dibuxos, onde lo imperceptible amplifícase emocionalmente escontra lo inesperao . Animal Locomotion ye una revisión de la obra homónima de Muybridge onde  l'estudiu del movimientu respuende a otros estímulos, casi de ritmu internu, fragmentos de contracción y relaxación, ónde lo anímico vuélvese fantasmagóricu y lo cotidianu trescendental.
Fernando Gutiérrez (Uviéu, 1973),vive y trabaya en Xixón. Desenvolvió la mayor parte de la so actividá artística dende presupuestos pictóricos. Nos últimos años centró la so producción nel dibuxu, esperimentando distintos procedimientos y téuniques qu'acaben per incorporar a la so obra'l colax como procesu de trabayu y la intervención gráfica, l'animación o l'animación interactiva como soportes habituales. La so obra caracterizase por l'usu de narraciones fragmentaes, nes qu'intervien imáxenes de consumu inmediatu o procedentes de distintos archivos al traviés d' un dibuxu qu'utiliza yuxtaposiciones y
pequeñes tresformamientos accidentales pa reconfigurase, articulando tou un imaxinariu utópicu de lo extraordinariu, dientro d'una poética suxetiva de calter emocional, sensitivu y dacuando lúdicu.
Premiu LABjoven Esperimenta 2008, Premiu ABC de Art y 2012 y Premio VIDA 15.0 Fundación Telefónica 2014, fizo numberoses esposiciones individuales y coleutives y participó en distintes muestres  institucionales nacionales ya internacionales. La so obra atópase en coleiciones públiques y privaes como Colección DKV, Centru d'Arte de Alcobendas, MAS Santander, CAB Burgos, Xunta de Castiella y Llión, Embaxada d'España en Senegal, Embaxada d'España en Qatar o la Cancillería d'España en Xapón.