Amartya Sen Premiu Princesa d' Asturies de Ciencies Sociales 2021

Amartya Sen Premiu Princesa d' Asturies de Ciencies Sociales 2021, les sos investigaciones sobre les hambrunes y la so teoría del desenvolvimientu humanu, la economía del bienestar y los mecanismos subxacentes de la probeza contribuyeron a la llucha contra la inxusticia, la desigualdá, la enfermedá y l'ignorancia.

Dende una perspectiva cosmopolita ya interdisciplinar, les múltiples investigaciones de Sen inclúin aportaciones a les teoríes de la elección pública y del desenvolvimientu, la economía del bienestar y otres empobinaes a afayar los raigaños de la probeza y les hambrunes. El so enfoque de les capacidaes de les persones estendióse al conxuntu de les ciencies sociales. Tola so trayectoria intelectual contribuyó de manera fonda y efectiva a promover la xusticia, la llibertá y la democracia.
La so siguida y escelente llabor influyó de manera decisiva nos planes de desenvolvimientu y nes polítiques de les más relevantes instituciones mundiales. Amás, fundó una escuela universal comprometida cola defensa de los drechos humanos, que fixo del profesor Sen una figura clave del pensamientu actual y un maestru de maestros.