Al Llau del Llar nel Hotel Rural Arniciu

Esti martes 16 d'ochobre tuvimos faciendo'l programa Al Llau del Llar nel Hotel Rural Arniciu en Casu . Dempués d'una ensundiosa comida preparada por Diego Aladro ficimos el programa Javier del Caño, Nacho Fernández y Martín Ardines. El protagonismu túvolu la sección El LLagar de Lan onde Diego Aladro falónos del so restorán y de la carne de reses casines que sirve nel so establecimientu y nel Restorán madrilanu rexentáu por Alex "El Rincón d'Enrique" ,con quien tamién falamos de gastronomía xunto a dellos de los personaxes interpretaos por Nacho Fernández .
N' Al Llau del Llar tuvimos les secciones habituales, onde Lorena nos comentó les novedaes cinematográfiques nos Cines Artesiete. Manuel Ángel Cuesta esplicónos les actividaes del Certame de Curtiumetraxes de Samartín del Rei Aurelio CINESAN qu'empieza'l domingu 21. Juanjo Navarrete, director y actor del Grupu de Teatru Padre Coll, falónos de la obra "COMO DOS GOTES D'AGUA" que ponen n'escena'l vienres 19 nel Teatru de L'Entregu dientro de la 5ª Muestra de Teatru Cómicu de Samartín del Rei Aurelio y entrevistamos a Emilio García Longo, Alcalde de Parres y Juan Manuel Cofiño González , Presidente de l'Asociación Asturias Actual por cuenta de la presentación del llibru "ASI ES PARRES" que va tener llugar el sábadu 20 d'ochobre nel Centru Asturianu de Madrid.
El programa emítese esti miércoles a les 18:30 y 22:00 hores, además del vienres a les 10:00 hores.Y tola programación ta disponible nos podcast de Radio San Martín.