Actividaes nel Centru Niemeyer
El Centru Niemeyer ufierta pa los próximos díes horarios ampliaos para les sos esposiciones y una completa programación con ópera, teatru y cine.
El vienres 27 d'abril a les 20:00. Ópera. "Lohengrin", de Richard Wagner, grabada na Semperoper Dresden d'Alemaña en mayu de 2016. La sala Cine acueye la proyección d'esta ópera na qu'un asesinatu desencadena un xuiciu que termina nuna ordalía, un duelu a muerte ente un conde y un campeón que va lluchar en nome de l'acusada. Preciu: 12 €.
El sábadu 28 d'abril a les 20:30. Teatru. "La tenrura". Alfredo Sanzol escribi y dirixe esta comedia romántica d'aventures na que trés princeses y trés lleñadores atópense nuna islla erma cuando cada grupu trata de fuxir del xéneru opuestu. Sanzol plantega con esta obra la imposibilidá d'escapar del sufrimientu cuando se busca l'amor y failo al traviés de los elementos habituales de les comedies shakesperianas: el xuegu, l'engañu, los cambeos d'identidá, el tracamundiu de personalidaes. Preciu: 25 €.
El domingu 29 d'abril a les 12:30 y 17:00. Espectáculu infantil "Yo tengo derechu a xugar", de Cantajuego. Los CantaJuego tornen al Centru Niemeyer col so nuevu espectáculu, nel que desplieguen tola so enerxía al traviés de los cantares más populares del so estensu repertoriu, incluyendo ésitos como "Viva'l mio planeta" o "CantaJuego in English". Pa dambes funciones tan solo queden entraes a la vienta con visual amenorgada. Estes cunten con un 40% de descuentu sobro'l preciu xeneral de 18 € y tan solo pueden adquirise nes taquilles del Centru Niemeyer, Llaboral Ciudá de la Cultura y CITPA Uviéu.
El domingu 29 d'abril 20:00. Cine. "Handia". Jon Garaño y Aitor Arregi dirixen esti drama asitiáu nel País Vascu y grabáu n' euskera nel que Martín, en lluchando na Primer Guerra Carlista, vuelve al so caseríu familiar en Guipúzoca, onde afaya con sorpresa que'l so hermanu menor ye muncho más altu de lo normal. Esti fechu trái-yos fama y dineru y va camudar pa siempres el destín de la familia. Proyección en VOSE. Preciu: 5 €.
Esposiciones. Les esposiciones Franco Fontana. Fotografía" y "The Global Symbol", d'Avelino Sala podrán visitase de forma ininterrumpida dende'l vienres 27 d'abril hasta'l próximu domingu 6 de mayu nel so horariu habitual: de 11:00 a 14:00 y de 16:00 a 19:00, siendo la última hora de la tarde d'apertura gratuita. Preciu xeneral: 5 €.
A toa esta actividá xúnese la programación infantil d'Educa Niemeyer col taller en familia "Culiebra klip-klap" del sábadu 28 d'abril y los talleres Robotix del 29 d'abril y 2 de mayu.