8 de marzu,Día Internacional de la Muyer en Samartín del Rei Aurelio

La Conceyalía d'Igualdá de Samartín del Rei Aurelio y les asociaciones de muyeres que formen parte del Conseyu Municipal de les Muyeres ellaboraron un ampliu programa d'actividaes qu'inclúi esposiciones, performances, talleres pa educación primaria y secundaria, distinciones, presentación de llibros y distintes ponencies, xuntu con otres actividaes consolidaes como l'homenaxe a les muyeres nonaxenaries o l'alcuentru de muyeres.
Nesti sentíu,  destaquen una serie d'actos deportivos como son una distinción a la Escuela d' Iniciación del Club de Fútbol San Martín por defender los valores de la igualdá nel deporte, la esposición "Muyer y deporte n'Asturies" o la charra "Muyeres nel fútbol: actualidá y futuru".
Per otra parte, va celebrase un plenu estraordinariu'l día 9 de marzu que va dar pasu na mesma xornada a la performance "El violador yes tu", na plaza de Ramón y Cajal.
El programa tamién contempla les ponencies: "Igualdá y roles nel colectivu LGTBI", al cargu de Xega; "Sin habitación propia" y "Tras las huellas de Jane Austen", entamáu pola asociación Les Rosalíes, sobre la vida y obra de l'afamada escritora. Amás de la presentación del llibru "Voces del ayeri", d'Inés Iglesias; una representación teatral del grupu Refaxu o la proyección de la nueva versión del llargumetraxe "Mujercitas"nos cines Artesiete del Nalón.
Otros actos previstos son un taller d'improvisación, la representación de la obra "Las Cervantas", de Baluarte teatro y la charra "Feminismu y ecoloxía", promovida por Mujeres Alameda.