41 Selmana de les Lletres Asturianes
Na so 41 edición, la Selmana de les Lletres recupera la figura de la escritora María Teresa Villaverde, Tuxa (1882-1934), a quien homenaxea cola edición del llibru Postrer adiós. Prosa, poesía y teatru, y el documental Tuxa, tradición y sentimientu. Llibru y documental van presentase'l llunes, día 28, na Casa de los Hevia, en Villaviciosa. Tuxa foi una escritora del Rexonalismu de la primer metá del sieglu XX qu'escribió poesía ,narrativa y teatru.
Al Día del Llibru Asturianu, que se celebra'l vienres 2 d'ochobre, van sumase anguaño 47 llibreríes de toa Asturies, que van sacar los sos puestos a la cai y aplicarán un 10 % de descuentu na compra de llibros y discos n'asturianu, amás de regalar un exemplar del mentáu Postrer adiós. Prosa, poesía y teatru, hasta fin d'existencies.
Ente les otres actividaes que se desendolcarán na 41 Selmana de les Lletres Asturianes la Sala Borrón d'Uviéu acueye'l quintu concursu de microrrellatos improvisaos n'asturianu pa mocedá, y van presentase los llibros ganadores de los Premios Asturies Xoven de poesía, narrativa y testos teatrales 2019; esto sera'l martes 29 de setiembre .
El miércoles 30 de setiembre,na Casa de la Cultura d'A Veiga y baxo'l xenéricu Homenaxe ás nosas lletras, va presentase'l númberu 11 de Trabatel. Revista eonaviega de lliteratura. Delles llibreríes del occidente asturianu van regalar la publicación cola compra de llibros o discos en gallego-asturianu.
El programa de la Selmana de les Lletres presenta'l Conciertu de les Lletres Asturianes, que baxo la dirección d'Óliver Díaz, va protagonizar la Orquesta Sinfónica del Principáu d'Asturies (OSPA) el llunes 28 nel Auditoriu Príncipe Felipe d'Uviéu. La OSPA va interpretar un programa con obres de compositores vinculaos con Asturies: Covadonga, de Facundo Viña, Tres danzas sinfónicas, de Julián Orbón, Asturias desde la distancia, de Jorge Muñiz, y Escenas asturianas, de Benito Lauret.