30 años de Martirio nel Centru Niemeyer

04.12.2017

Esti sábadu 9 d'avientu la cantante onubense va actuar nel Auditoriu acompañada por un cuartetu de jazz dientro la so nueva xira, "30 años".

30 años de carrera axuntaos nun conciertu. Esa ye la propuesta con que Martirio llega al Auditoriu del Centru Niemeyer el sábadu 9 d'avientu a les 20:30.

Martirio celebra asina trés décades de trayectoria musical revisitando los sos clásicos más destacaos cola enerxía y la vivacidad de siempre, dándo-yos nuevos aires y celebrando con ellos toa una vida d'ésitos y allegríes. Nesta ocasión va actuar acompañada por un cuartetu de jazz compuestu por Raúl Rodríguez a la guitarra, Jesús Lavilla al pianu, Reinier Elizarde "Negrón" al contrabaxu y Martín Bruhn a la batería.

Con esti conciertu Martirio busca abrir una puerta al so poliédricu universu, ordenando delles idees alredor de la so obra, presentando otres nueves y matizándoles toes. Asina, la nueche de l'actuación va sirvir para esfrutar de 30 años de carrera resumíos nun conciertu.

Maribel Quiñón Gutiérrez (Huelva, 1954), más conocía como Martirio, empezó la so andadura artística col grupu Jarcha na década de los 80. En 1986, al pie de Kiko Veneno y Pata negra de "Veneno", publicó'l so primer discu: "Toi mala".A partir d' ehí entama la carrera d'una artista en constante evolución, pionera na recuperación y actualización de xoyes de la música popular española y suramericana.La so imaxe enigmático y sofisticao ye la tarxeta de presentación d'una artista siempres interesada, moderna y vanguardista. A lo llargo de la so estensa carrera collaboró con músicos de les más diverses tendencies y estilos: Kiko Veneno, Chano Domínguez, Raúl Rodríguez, Raimundo Amador, Kenny DrewJr, Jose María Vitier..., y compartió la so música con artistes tan diversos nel so arte como Chavela Vargas, Javier Ruibal, María del Mar Bonet, Susana Rinaldi, Soledad Bravo, Omara Portuondo, Compay Segundo, Luis Pastor, Lila Downs, Son de la Frontera, La Shica, Alberto Cortez, Ojos de Brujo, Miguel Poveda, etc.

Mientres trés décades de carrera, Martirio anovó la copla española dotándola de la universalidá que merez y llibrándola d'atadures del pasáu. Somorguióse nel flamencu, nel jazz, la bossa nova, el tangu, el boleru, el pop, el rock ya inclusive les sevillanes, nadando bien adientro pa regalanos la so esencia.

Les entraes para esti conciertu tán a la venta con un preciu de 18 €. Les localidaes pueden adquirise nes recepciones del Centru Niemeyer y de Llaboral Ciudá de la Cultura en Xixón.

Share