"A tou tren, destín Asturies" inaugura'l Festival de Cine de Samartín del Rei Aurelio

El llunes 12 de xunetu, a les 18 hores entama'l Festival Internacional de Curtiumetraxes Cinesan  cola proyección del llargumetraxe "A tou tren. Destín Asturies", del director Santiago Segura nos Cines Artesiete Nalón de L'Entregu.

La entrada ye gratuita con invitación, que puede recoyese na Casa de la Mocedá o na Casa Conceyu nel departamentu de Cultura.

Esti mesmu llunes 12 de xunetu tendrá llugar l'apertura de la convocatoria del certame que yá recibió más de 200 curtios de procedencia nacional ya internacional.
Hasta la fecha, el mayor númberu de curtiumetraxes son de procedencia nacional, pero tamién se presentaron trabayos d'América Llatina, Estaos Xuníos o Europa (Francia, Alemaña, Suecia, Italia o Reinu Uníu). De la mesma, recibiéronse curtios n'asturianu o rodaos n'Asturies. El plazu pa la presentación de los trabayos, al traviés de les plataformes Movibeta, Festhome y Clickforfestivals, pésllase'l 3 de setiembre.
El festival contempla un premiu pal meyor curtiu de la sección oficial y pal meyor curtiumetraxe de la sección asturiana, y un tercer galardón pa la meyor interpretación.
Amás del certame de curtiumetraxes, el festival cunta con secciones paraleles rellacionaes col cine clásicu, independiente o de xéneru.