Inauguración Sala de la Canción Asturiana"Silvino Antuña"
L'Asociación Bicentenariu de Samartín del Rei Aurelio empobinó una conferencia sobre Silvino Antuña esti vienres 12 de payares na Biblioteca Pública de Sotrondio coincidiendo cola inauguración de la SALA DE LA CANCIÓN ASTURIANA "SILVINO ANTUÑA".
Sobre la figura del "maestru de la tonada" faló'l musicólogu Héctor Braga y nel actu, amás de la viuda de Silvino Antuña, Ceferina Cabeza, tuvieron l'alcalde del conceyu, José Ángel Álvarez "Quirós" la conceyala de cultura, María Alonso ,representantes d'entidaes culturales y numberosos instrumentistes ya intérpretes de canción asturiana.
Presentó l'actu'l presidente de l'Asociación Bicentenariu de Samartín del Rei Aurelio, Xose Ramón M. Ardines.
Na Sala de la Canción Asturiana "Silvino Antuña" reúnese una estensa colección discográfica de la hestoria del cantar asturianu xunto con otros fondos documentales del legáu del musicólogu Silvino Antuña, que fueron donaos pola vilba del maestru, Ceferina Cabeza García.
Discos inéditos y de pizarra de valor incalculable, partitures y otros documentos en papel, grabadores o gramófonos formen parte del pervalible legáu del maestru rellacionaos cola tonada asturiana .
Silvino Antuña foi siempres un referente del cantar asturianu qu'exerció durante años una importante y altruista llabor de fomentu de la tonada al traviés de la formación de nueves voces. "Les puertes de la so casa siempres tuvieron abiertes a la conocencia de la tonada, como queda demostráu polos munchos cantantes y estudiosos del cantar asturianu que lu visitaben asiduamente y que reconocíen en Silvino una fonte de conocencia", recordóse nel actu.
El compromisu d'acondicionar una aula de la tonada que recoyera la colección discográfica del musicólogu entama a finales de 2017, coincidiendo cola concesión a títulu póstumu d'una cai col so nome en Sotrondio pa rindir tributu al so llabor de fomentu y espardimientu del cantar mientres tola so vida; que cuntó col alcuerdu unánime del Plenu Municipal.
Silvino Antuña foi precursor de la Escuela de Tonada d'Asturies y profesor d'intérpretes que dempués convertiríense en grandes intérpretes del cantar asturianu, como El Che de Cabaños, Gerardo Orviz , Diagmina Noval, Pilar Barreñada, Jesús Alonso o'l propiu Héctor Braga que fizo una entretenía y didáutica charra sobre Silvino Antuña y el so legáu.
