Ilesia de Santa María en Villamayor
Nel conceyu de Piloña, atopamos l'enclave nel que s'atopaba l'antigua ilesia monacal de Santa María perteneciente al conventu benedictín qu'esistía en Villamayor y na que s'alluguen los restos de l'antigua edificación, una interesante muestra del arte románicu.
Del antiguu conventu de monxes benedictines namás se caltien una parte del templu que fuera fundáu nel sieglu XI ,la so construcción atribúyese al Maestru de la Cámara Santa de la Catedral d'Uviéu. El conventu llegó a ser bien poderosu y en delles ocasiones tuvo arrodiáu de discutiniu. En 1377 l'obispu d'Uviéu Gutierre de Toledo depunxo a l'abadesa y distribuyó al restu de miembros de la congregación por otros conventos por "dexenerada y pol descuidu de la so riegla de santidá y pureza". Años más tarde, en 1530 repitese la situación y foi anexionáu a San Pelayo d'Uviéu. Col tiempu veríase amenorgáu a un simple prioratu y l'ilesia convertida nel templu del campusantu, hasta qu'en 1836 foi desamortizáu. Más tarde la ilesia y el conventu seríen utilizaos como cárcel, en 1910 conviértese n'escuela y dempués de dellos años d'abandonu dende apocayá alluga un centru social con sala polivalente y biblioteca.
A pesar de que namás se caltién una parte de la obra primitiva, la ilesia de Santa María de Villamayor foi declarada Monumentu Nacional el 3 de xunu de 1931 gracies al so ábside y a la so puerta sur, perfectamente conservaos.
L'ábside semicircular, vinculáu al románicu internacional y de menor altor que'l tramu rectu de la nave, lleva nel esterior una cornisa axedrezada con canecillos y metopes, dos columnes adosaes con capiteles vexetales, una estrecha ventana nel centru con arcu dobláu qu'apoya sobre dos columnes coronaes por capiteles vexetales, y dos bandes d'axedrezáu que lu percuerren horizontalmente estremándolu en trés altores. Ta decoráu internamente con ocho arcos ciegos de mediu puntu, protexíos por un guardapolvu axedrezáu, que s'apoyen en columnes colos capiteles finamente tallaos. Los arcos tán decoraos con boles. Los sos capiteles tán decoraos con motivos vexetales, páxaros y besties monstruoses con grandes boques dentaes.
Completen la decoración del ábside dos moldures horizontales y una ventana de doble derrame decorada con una arquivolta suxeta en dos columnes colos capiteles esculpíos con motivos vexetales. Esta mesma decoración repítese na cara esterior de la ventana. Tamién ye bien interesante l'arcu triunfal. Ye de factura bien cenciella, formáu por dos arcos de mediu puntu dovelaos. Los sos capiteles tán esculpíos con motivos vexetales de fines traceríes.
Pela parte esterior l'ábside ta dividíu en trés espacios gracies a dos columnes adosaes colos capiteles esculpíos con motivos vexetales y animales, dividíu verticalmente gracies a dos llínees de imposta. Sol teyáu atópase una cornisa axedrezada, apoyada en canecillos esculpíos. Les metopes tamién tán esculpíes con motivos vexetales.
La puerta d'accesu atópase nel muriu sur de la nave, ta formada por trés arquivoltes planes de mediu puntu, protexíes por un guardapolvu axedrezáu, que s'apoyen en dos pares de columnes. Éstes tienen los capiteles esculpíos con motivos vexetales los esteriores y con aves nos interiores. Sobre la portalada atópase un pequeñu teyaroz, sofitáu en canecillos esculpíos de forma similar a los del ábside.
Tantu pola so construcción como polos materiales emplegaos y la esbeltez de les sos proporciones y recursos decorativos esti templu ta consideráu como unu de los meyores exemplos del románicu asturianu, un llugar pa visitar en Piloña.