Durante el mes de xunu Alicante celebra'l cambéu d'estación con Les Fogueres,una fiesta na que la ciudá camudó les antigües fogueres coles que celebraba'l solsticiu de branu dende va bien de tiempu y que en 1928 deciden evolucionar, emulando les falles de la so vecina Valencia y anguaño son un gran atractivu turísticu. Les cais y los barrios arréyense al traviés de vecinos y asociaciones na ellaboración d'estes fogueres-falles que son quemaes na nueche de San Juan, el 24 de xunu. Pos primeramente, la nueche anterior y al igual que nel restu d'España lo que se quemen son pequeñes fogueres, na sablera del Postiguet, de Sant Joan, l'Albufereta, nos parques, o n'una esquina d'una cai o plaza onde mayores, neñes y neños depositen nos pequeños fueos qu'allumen la nueche, los sos deseos y querencies.
L'afición pola pólvora del llevante español y sobremanera de la Comunidá Valenciana, como demuestren les famoses Falles de Valencia, faise patente tamién estos díes n'Alicante onde neños y neñes encienden tou tipu de voladores y petardos. La festividá coincide cola celebración de San Xuan y la Virxe de los Remedios, patrona de la Ciudá, a la que les distintes asociaciones que llevanten Les Fogueres, más d'ochenta, lleven ufriendes florales nun festexu que dura delles hores. Y a l'igual qu'en Valencia,por ser la más conocida, pero tamién como nel restu de la Comunidá, la fiesta entamar na plantá, la mascletá y la cremá. Envalórase l'asistencia d'un millón de turistes, que compaxinen sablera y otros recursos lúdicos cola almiración de Les Fogueres poles distintes places y barrios de la ciudá. Prácticamente ta cortáu'l tráficu rodáu en tol cascu urbanu, tomaes les cais poles barraques qu'arrodien a Les Fogueres y nes que durante la nueche actúen orquestes en directu, otra gran tradición de la Comunidá Valenciana: la música. Puede dicise que la ciudá y tolos servicios municipales tán al serviciu de la fiesta.