El Tesoru del Rei Aurelio
L'Asociación Bicentenariu de Samartín del Rei Aurelio, en collaboración col Ayuntamientu de Samartín del Rei Aurelio, presenta la versión dixital de "El Tesoru del Rei Aurelio", el xuegu lúdicu que se presentó va un añu a manera de "sala d'escape" pa dar a conocer la hestoria del conceyu y normalizar l'usu del asturianu.
L'Asociación Bicentenariu de Samartín del Rei Aurelio suspendió va dos meses la so actividá presencial col estáu d'alarma de resultes de la situación sanitaria y vuelve a entamar agora la so actividá cola presentación d'esti xuegu, al que puede aportase dende cualquier dispositivu móvil y percuérrese la hestoria del conceyu con cencielles pruebes. Amás, les venti primeres persones que la resuelvan van recibir un llibru n'asturianu.
El Tesoru del Rei Aurelio presentóse va un añu como "sala d'escape allugada na Casona del Bravial en Blimea y , al igual que naquella ocasión , la trama desenvuélvese na sala privada d'un coleccionista onde falta la pieza más preciada, la Cruz d'Aquisgrán, que'l mesmu Carlomagno regalara al Rei Aurelio y qu'hasta la so desapaición mientres les guerres carlistes formaba parte del cayáu de mandu de los alcaldes de Samartín del Rei Aurelio, realizáu con vara d'ablanar y que recibió'l primer alcalde cuando se constituyó'l conceyu en 1837. Una cruz que foi robada y que los participantes na actividá tendrán d'atopar superando les pruebes que se presenten tres visionar la película na que D. Antonio, interpretáu por Nachu Fernández, introduz l'aventura.
L'Asociación Bicentenariu de Samartín del Rei Aurelio vien entamando mensualmente dende va seis años distintes actividaes nes que se busca la participación activa de ciudadanos, investigadores, entidaes ya instituciones pa promover la investigación en distintos campos académicos sobre Samartín del Rei Aurelio y l'espardimientu de les iniciatives creatives, emprendedores o investigadores de vecinos o orixinarios del conceyu. Con esta propuesta vuélve a entamar l'actividá de l'asociación tres la crisis sanitaria.