EI San Martín 0 - 1 Real Avilés I
El Samartín concluyó antes de lo deseyao la so bona temporada al quedase a les puertes de la final del 'play off' a Segunda RFEF, al ganalu n'El Florán l' Avilés por 0-1. El conxuntu avilesín aprovechó un solitariu gol de Natalio nel últimu minutu de la primer parte de la prórroga pa siguir na llucha pol so oxetivu.
Nuna primer metá de ritmu baxu, pero non exenta d'oportunidaes de peligru, los avilesinos tuvieron a puntu d'abrir el marcador dempués d'un mal despexe de Landry que Natalio quixo rentabilizar con un remate qu'alzó demasiao. La rempuesta del Samartín llegó al traviés d' Ebea, que con una potente internada forzó un saque d'esquina bien defendíu pola zaga visitante
Los de Chiqui de Paz acercáronse al gol nun córner botáu por Márquez que cabeció Monasteriu y estenó sobre la llínea de gol Guille Vázquez. Un centru d' Abu pola derecha remataríalu de cabeza en plancha Landry, pero'l balón perdióse pola llínea de fondu. L'esfuerzu del Samartín tuvo cerca de fructificar tres una bona dexada de Dorian que preludió un remate de Márquez repelíu pol poste.
Na segunda metá, avisó l'Avilés a los seis minutos a balón paráu, con un saque d'esquina botáu por Edu Cruz que foi peñáu na frontera de l' área pequeña y perdióse llambiendo'l poste. Acabante superar la hora d'alcuentru Cedric Mabwati conectó con Natalio, qu'unvió'l balón na rede, pero'l colexáu decretó posición antirreglamentaria. El capitán de los avilesinos intentólo de nuevu con un remate que se foi percima del llargueru por pocu y nel últimu minutu Mabwati intentó desfaer les tables con una falta que s'estrelló na barrera
L'Avilés dio un pasu al frente na prórroga y protagonizó les llegaes más peligroses. N'avisando minutos antes, Natalio resolvió la eliminatoria al rematar nel segundu palu una unviada de Priendes dende la derecha. El San Martín esforzóse en busca del empate y tuvo les opciones más clares nes botes de Jordan y Mati. Los visitantes aguantaron a pesar de la espulsión a la fin de Natalio.
