Moto GP
MotoGP ye la máxima categoría del Mundial de Motociclismu,
consideráu ésti como'l certame internacional más importante nel ámbitu de
motociclismu de velocidá. La so organización vien determinada pola Federación
Internacional de Motociclismu (FIM), al igual qu'asocede coles otres categoríes
del campeonatu (Moto2 y Moto3).
Trátase de la categoría reina" del campeonatu, pos
nella compiten les motos de mayor cilindrada. Dende mediaos de los 70 hasta
l'añu 2002, la categoría dexaba una cilindrada de 500cc ensin tener en cuenta
si'l motor yera de dos o cuatro tiempos. Por cuenta de esto, tolos motores yeren
de dos tiempos gracies al so mayor apurre de potencia a igual cilindrada. En
2002 camudó la reglamentación para facilitar el saltu a los cuatro tiempos,
probablemente influyíu pola baxa cuota de mercáu de les motos de cai d'elevada
cilindrada y dos tiempos. Les nueves regles dexaron a los constructores escoyer ente motos de dos
tiempos (500cc o menos) y motos de cuatro tiempos (990cc o menos).
Pese al importante aumentu de costos que significó esti
cambéu, debíu al aumentu de cilindrada, les motos de cuatro tiempos dominaron a
los rivales qu'inda usaben motores de dos tiempos. El resultáu foi qu'a partir de 2003 nun quedaben yá
motocicletes de dos tiempos na categoría reina, conocida dende entós como
MotoGP. Más tarde, en 2007, la Federación Internacional amenorgó a 800cc la
cilindrada máxima; sicasí, en 2012 pásase a un formatu de 1000cc.1
Con esa medría de cilindrada, corría peligru'l récord de
velocidá punta. Tala marca fuera establecida por Dani Pedrosa en 2009 nel
circuitu italianu de Mugello, algamando los 349,3 km/h con una moto de 800cc;
Pedrosa superó asina a Loris Capirossi, que llegara hasta los 347,4 km/h con
una moto de 990cc.
Anguaño, hai un nuevu récord de velocidá establecíu nel
premiu d'Italia en Mugello, foi midíu la mañana del sábadu 31 de mayu de 2014
mientres les "Free practice 3" o práctiques llibres 3. El pilotu que
lo llogró foi l'italianu Andrea Iannone,
a bordu del so potente Ducati Desmosedici del equipu Pramac Racing. La velocidá
oficial rexistrada polos sensores de Dorna foi de 349,6 km/h colo que supera en
0,312 km/h l'anterior rexistru qu'había hasta la fecha consiguíu por Dani Pedrosa en 2009 n'esi mesmu escenariu.
El mesmu Andrea Iannone superó dichu récord nel GP d'Italia
en 2016, celebráu'l 22 de mayu nel circuitu de Mugello, estableciéndolu en
354,9 km/h.
