Cuevas del Mar

Durante'l branu solemos planteganos nuevos proyectos y oxetivos,la mayoría de les vegaes les nueses visites turístiques déxense llevar polos tópicos qu'afaten la xeografía y que, basaes en fechos culturales, contribúin a esfrutar del llugar con pincelaes anecdótiques coles qu'ilustramos para la posteridá les nueses alcordances.
Aína somos daos a acomuñar llugares con personaxes reales o imaxinarios: Cuadonga con Pelayo, La Mancha con Don Quixote. O con ritos o fiestes como Pamplona colos Sanfermines y l'escritor Ernest Hemingway.
Nel conceyu de Llanes atópase una contorna claramente definida, el Valle de San Xurde. Yá'l so propiu nome ufierta referencies mitolóxiques, el trunfu del héroe, convertíu en Santu, sobro'l dragón. Nesti valle visitamos la sablera de Cueves del Mar na que la mar modeló incansablemente dende va sieglos un estraordinariu paisaxe nos sos murios de caliar. Na que dende los sos cantiles o castros puede vese en díes claros el Picu Urriellu y onde según l'historiador Eutimio Martino pudo producise'l desembarcu de les tropes romanes nel so intentu por conquistar el territoriu Cántabru apoderáu pola tribu de los Orgenomescos,según recueye l'autor nel llibru Roma contra Cántabros y Ástures. Equí llegaríen parte de les tropes de César Augusto tresportaes dende Aquitania nes guerres ástur-cántabres escontra l'añu 25a.C. N'este mesma paraxa empieza la calzada Nueva-Corao siguiendo la llínea que marca nel paisaxe'l ríu Ereba o ríu de Nueva, travesando'l so estrechu calce l'antiguu y llamativu Ponte de Vallina. Esta mesma ruta ta señalada como la que siguieron parte de la tribu de los Orgenomescos na so fuxida de los romanos escontra'l Mons Vindius, un monte de los Picos d'Europa pal qu'esisten distintes teoríes de localización y que sirvió de provisional abellugu a les tribus de la zona.
La mariña formada poles sableres de Guadamía, Cueves del Mar y Sanantoniu nel Valle de San Xurde tamién foi testigu de batalles rellacionaes cola invasión francesa y la guerra d'independencia entre 1808 y 1813, lo mesmo que de los ataques de les tropes nacionales a la resistencia republicana mientres la guerra civil de 1936-1939.
La Sablera de Cueves del Mar foi protagonista del cuentu en bable Nel y Flor del poeta llaniscu Pin de Pría, publicáu en 1926 y de la película You're the One (Una hestoria d'entós) de José Luís Garci. Esta película del añu 2000 ta protagonizada por Lydia Bosch, Julia Gutiérrez Caba, Juan Diego, Ana Fernández, Iñaki Miramón, Manuel Lozano, Fernando Guillén, Carlos Hipólito, Marisa de Leza y Jesús Puente. Foi galardonada con 13 premios internacionales, entre los que destaca l'Osu de plata del Festival de Berlín al apartáu artísticu y 5 Premios Goya: meyor actriz de repartu (Julia Gutiérrez Caba), meyor fotografia (Raúl Pérez Cubero) , meyor montaxe (Miguel González-Sinde) , meyor dirección de producción ( Luís María Delgado) y meyor dirección artística ( Gil Parrondo).
La trama desenvuélvese na España de finales de los 40 onde Julia ( Lydia Bosch) sufre una fonda depresión pola mor del encarcelamientu del so noviu José Miguel, un destacáu pintor antifranquista. Fía única d'una rica familia, ye una muyer bien culta, que s'educó en Suiza ya Inglaterra, llicencióse en Filosofía y Lletres y que quier ser escritora. La protagonista decide colar de Madrid y dir pasar una temporada al pequeñu pueblu asturianu de Cerralbos del Sella, onde ta la gran casona familiar -"Llendelabarca"- na que vivió los felices branos de la so infancia y onde s'atopa cola guardesa, Tida Gala, que vive cola so nuera Pilara y el so nietu Juanito. Otros personaxes como'l maestru don Orfeo y el cura don Matías, formen parte de la entrañable hestoria creada por José Luís Garci.
Cueves del Mar forma parte de la ruta turística Llanes de Cine, cola que'l Conceyu Llaniscu diseñó un reclamu turísticu para visitar los escenarios de rodaxe de 18 llargumetraxes, 3 series de televisión y 1 curtiumetraxe.Estos escenarios pueden visitase en www.llanesdecine.com.
El Valle de San Xurde en Llanes, onde visitamos la Sablera de Cueves del Mar cunta con molinos d'agua arrodiaos de lleendes, capiyes relixoses con precedentes milagrosos a les qu'alleguen peles nueches les ánimes en procesión, caminos xixilaos pol diañu burllón, ríos onde viven les xanes y palacios, como'l del Conde de la Vega del Sella onde habiten pantasmes.Pero para tou eso nun hai espaciu nesti apartáu, lo meyor va ser visitalo y afayar en paisaxe y arquitectura 'l pasáu mitolóxicu y de lleenda de la nuesa tierra.