Asturies a Lo Grande
La Conseyería de Cultura, Política llingüística y Turismu presentó en Xixón el programa Asturies a lo grande, una iniciativa que tien por oxetu "incentivar el consumu turísticu mientres los próximos meses, contribuyir a desestacionalizar la demanda y sofitar la creación de productos, paquetes y esperiencies", tal que esplicó la viceconseyera de Turismu, Graciela Blanco.
El proyectu ye frutu de la collaboración establecida durante l'estáu d'alarma ente'l Principáu y los principales axentes turísticos pa encarar la reactivación del sector na fase de nueva normalidá.
Asturies a lo grande inclúi 140 esperiencies y actividaes distintes que van poder esfrutar quienes reserven dos o más nueches d'estancia, ente'l 1 de setiembre y el 15 de payares, en dalgún de los 300 establecimientos xuntaos o axencies de viaxes autorizaes. El costu de caúna de les propuestes inclúyese na reserva del agospiamientu y nun supón un aumentu del preciu.
El programa, que cunta con una inversión total de 400.000 euros, va poner a disposición del sector más de 25.000 places n'actividaes de turismu d'aventura, observación de fauna, visites guiaes, entraes a instalaciones culturales, sesiones de bienestar, visites a centros de producción agroalimentaria, como queseríes o llagares o, inclusive, l'esfrute de menúes degustación en restoranes de Meses d'Asturies y Sidreríes d'Asturies.
Tola información tópesla en www.asturiasalogrande.es
o calcando na imaxen.